Aktîvîsta TJA’yî Sebahat Tuncel derheqê “Înîsîyatîfê Cinîyan ê Mi rê Aştî Lazim a” de îfade kerd ke cinî her tim vera şer aştî wazenê û vat: “Vengdayîşê Birêz Ocalanî hetê cinîyan ra bi coş yeno pêşwazîkerdene. Cinî fikirîyenê ke ver bi Anqara rayîrşîyayîşêk bikerê.”
Stenbol de mabênê 22 û 23ê sibata 2025î de konferansî “Cinî behsê aştî kenê” ame kerdene. Nê konferansî ra dima cinîyan “Înîsîyatîfê Cinîyan ê Mi rê Aştî Lazim a” awan kerd. Aktîvîstê Înîsîyatîfî ê wextî ra heta nika mabênê 4 aşman de seba aştî û demokrasî xeylê çalakîyî organîze kerdê û eşkerayî dayê çapemenî. Derheqê amanc, xebat û ameyoxê înîsîyatîfî ser o Aktîvîsta TJA’yî Sebahat Tuncel cewab da persanê ajansê ma.
‘Amancê cinîyan o yo ke şerê dinyayî biqedîyê’
Aktîvîsta TJA’yî Sebahat Tuncel ewil îfade kerd ke rojevo sereke yê cinîyan de her tim qedîyayîşê şerî est o û vat: “Kurdîstan û Tirkîya de hereketê cinîyan hem seba ke meseleyê kurdî zemînê şerî vejîyo û hem zî seba şer o ke Rojhelatê Mîyanên û dinya de yo biqedîyo, waştişanê xo kuçe û qadanê cîyayan de îfade kenê. Na xebate dem bi dem vinderte. La aşma sibate ra pey bi komxebate, înîsîyatîfî xo newe ra bi rêxistin kerd û kewt mîyanê têgerî.”
‘Xeylê temsîlkarê cinîyan ca gênê’
Derheqê temsîlkaranê Înîsîyatîfî de zî Aktîvîsta TJA’yî Sebahat Tuncel agahî dayê û vat: “Tirkîya de beşêko muhîm ê temsîlkaranê hereketê cinîyan mîyanê “Înîsîyatîfê Cinîyan ê Mi rê Aştî Lazim a” de ca gênê. Cinîyê Kurdîstanî, femînîst, sosyalîst, elewî, misilman, doktor, ekolojîst, lgbt+, temsîlkarê şarî, akademîsyen û xeylê beşê bînî ê cinîyan mîyanê înîsîyatîfî de ca gênê.”
‘Cinî azadîya amanc û sîyasetî wazenê’
Waştiş û pawitişanê seba aştî û çareserî yê komelî ser o zî Sebahat Tuncel wina vat: “Seba aştîya komelkî aver şêra, demokrasî û azadî aver şêrê, waştişê komelî zaf ê. La riyê îqtîdaro nikayên nê waştişî nêyenê vînayene. Şar û komel îqtîdarî ra bawer nêkenê. Cinî dîyar kenê ke tena bi bêvengkerdişê çekan aştî nêbena û wazenê îqtîdar kerdişanê vera demokrasî û zilmî ra fek verado. Cinî wazenê azadîya amancî aver şêra û astengîyê ke vernîya çalakî û eşkerayîyan de yê wirzî. Cinî wazenê azadîya sîyasetî bi hiqûq û qanûnan bêrê pawitene.”
‘Vengdayîş bi coş yeno pêşwazîkerdene’
Vengdayîşê Aştî û Komelê Demokratîkî yê 27ê sibate Kurdîstan, Tirkîya û dinya de bi girseyî û coş ame pêşwazîkerdene. Derheqê pêşwazîkerdişê vengdayîşê Aştî û Komelê Demokratîkî zî Sebahat Tuncel wina qisey kerd: “Vengdayîşê Birêz Ocalanî ê Aştî û Komelê Dmeokratîkî hetê cinîyan ra zaf bi kelecan ame pêşwazîkerdene. Tirkîya de demêko derg o ke rejîmê zilmî est o. Tecrîd est o û kerdişê qeyûmî est ê. Vera nê kerdişan têkoşîn û xoverdayîşêk zî est o. Cinîyan û şarê Tirkîya nê vengdayîşî seba aştî û çareserî sey berêko newe dî û bi kelecan pêşwazî kerd. Birêz Ocalan û hereketê azadîye kurde seba aştî û çareserî gamî eştê. La îqtîdarî gamê şênberî nêeştê. No nêzdîbîyayîşê îqtîdarî beno sebebê fikaranê “Gelo” û bêbawerîya hemverê îqtîdarî.”
Sebahat Tuncel tewr peyên xebatanê xo yê ameyoxî ser o zî vinderte û wina vat: “Înîsîyatîf plan keno ke rojanê ameyoxan de ver bi Anqara rayîrşîyayîşêk bikero. Reyna seba aştîya komelkî biba û ma cinîyan hîna zaf beşdarê prosesî bikerê û waştişê cinîyan ê têduştî, azadîye û aştî teqez bikerê, do xebatê ma dewam bikerê.”
