Kaykeranê Grûba Tîyatroyî yê DÎSSA’yî dîyar kerd ke do tîyatroyê Kurdkî aver berê û wina vat: “Amancê ma o yo ke ma bi tîyatro ziwanê xo aver berê.”
Grûba Xebatgeyê Huneranê Sehneyî yê Dîcleyî (DÎSSA) serra 2022 de Unîversîteya Dîcle de ameya awankerdene û bi tîyatroyê Kurdkî vejîyena vernîya wendekaran. Kaykeranê Grûba DÎSSA ra Selîm Akgul, Rengîn Azarkan û Seher Cebe amancê grûba xo, averşîyayîşê tîyatroyê Kurdkî, beşdarbîyayîşê wendekaran û problemanê xo yê ekonomîkî ser o Ajansê ma qisey kerd û dîyar kerd ke amancê înan averberdişê Tîyatroyê Kurdkî yo.
Amancê ma averberdişê ziwanê Kurdkî yo
Kayker Selîm Akgul îfade kerd ke Grûba Tîyatroyî ya DÎSSA’yî 2022 de bi sloganê “Tîyatroyê Kurdkî aver bere” ameya awankerdene û nê çîyî vatî: “Ez nê di serrî yê endamê DÎSSA’yî ya. Na grûbe seba tîyatroyê Kurdkî ameya awankerdene. Kayê ma yê destpêkê serre “Şvayk û Hîtler” bi. Par zî ma bi nê kayî sehne girewt. “Şvayk û Hîtler” kayê ma yo sereke yo. Seba ke wendekarî tîyatroyê Kurdkî ra hes kenê, beşdarbîyayîşê înan baş o. Xora amancê ma averşîyayîşê ziwanê Kurdkî yo. Her qade de kuçeyan de, şaristan û keyeyanê xo de ma wazenê şarê ma bi ziwanê xo qisey bikero. Kurdkî ziwanê ma yê dayîke yo, o semed ra ma wazenê aver şêro.”
‘Ma do tîyatroyê Kurdkî aver berê’
Selîm Akgulî dîyar kerd ke rayberîya unîversîteyî zî hetê ekonomî ra tu hetkarîya înan nêkena û wina vat: “Di serrî ra ver ma şîyê Unîversîteya Bogazîçî ya Stenbolî. La rayberîya Unîversîteya Dîcleyî hetkarîya ma nêkerde û ma bi îmkananê xo şîyê kayê xo kay kerd. Tena Şaredarîya Amedî ya Şaristanê Girdî hetkarîya ma kerd. Xeylê qadan de ma rê nêbenê hetkar û ser de zî ma rê astengîyan vejenê. La ma tu wext apey game nêerzenê û ma do tîyatroyê Kurdkî aver berê.”
‘DÎSSA estbîyayîşê xo Kurdkî ser o awan kena’
Kaykera Grûba DÎSSA’yî Rengîn Azarkan zî dîyar kerd ke tîyatroyê Kurdkî de cayê cinîyan xeylê muhîm o û wina vat: “Ma fikirîyenê ke grûba ma senî gird biba û ma hewl danê ke biresê wendekaran. Ma ewilî unîversîte de standan ronenê. Dima ma bi kesanê ke muracat kerdo, înan reyde pêvînayîşan kenê û seba DÎSSA’yî weçînenê. Embazê ma yê ke tîyatro baş zanê, perwerde danê înan û musnenê. DÎSSA estbîyayîşê xo ziwanê Kurdkî ser o awan kena. Sehneyê ser o mesajê Grûba DÎSSA ziwanê Kurdkî yo. Sey nimûne ma kayê “Çayxana Sero û Fero” de muhîmîya ziwanê Kurdkî nîşan da.”
‘Ma wazenê wendekarî beşdarê ma bibê’
Seher Cebe derheqê xebatanê xo yê emserrî de dîyar kerd ke do 21, 22 û 23ê teşrîna verêne de bi ronayîşê standan daşînasnayîşê xo bikerê û qiseykerdişê xo wina domna: “Hîrê aşmî ra pey ma do dest bi kayanê xo bikerê. Kayê ma yê mîyanê serre de yew bi tirkî û çar hebî zî bi Kurdkî yê. Aşma gulane de zî do kayê ma yo gird bibo. Embazê ma yê tîyatroyî xeylê baş û serkewte yê. Kayê ma seba ma zaf muhîm ê. Ma wazenê wendekarî bêrê beşdarê ma bibê û grûba ma gird biba. Wa temaşekerdoxî bêrê û ma bişinasnê. Wa rayberîya Unîversîteya Dîcleyî zî wexto ke ma şîyê Unîversîteya ODTU û Unîversîteya Bogazîçî hetkarîya ma bikera. Amancê ma o yo ke ma bi tîyatro ziwanê xo aver berê.”
