Amed – Welatijo bi nameyê Mehmet Alî Baskin ku 30 serrî yo karê dezgehdarî keno, qezaya Sûrî ya Amedî seba ke debara xo bikero rêbas yan zî hîre, kenger û gulik û neheyan roşeno.
Ribês yan zî hîre, sîrva û kenger Kurdîstanî de nê mewsîman de vejîyenê û şar tira zaf hes keno. Nê vaşî Vakûrê Kurdîstanî de xeylê cayan de yenê komkerdene û merdim eşkeno vajo heme cayê şaristanî de dezgehan ser o yenê rotene.
Welatijo bi nameyê Mehmet Alî Baskin 30 serrî yo dezgehan ser o bi rotişê vaşanê sey kenger, rêbas yan zî hîre, nehey û sîrva debara xo keno. Mehmet Alî baskin da zaneyene ke kenger ewil koyanê Qerejdaxî de vejîyeno û reseno înan. Rêbas zî koyanê Colemêrg, Wan, Pasûr Bêdlîsî de vejîyeno. Mehmet Alî Baskin îfade kerd ke nê vaşî înan rê hetê merdimanê înan ra pê mînîbusan yenê suke û ê zî înan ra herînenê û roşenê. Rotoxê vaşan Baskin kîloyê kengerî 150 TL, desteyê neheyan 30 TL, kîloyê rêbasî 250 TL û kîloyê sîrva zî 700 TL’yî ra roşeno.
‘Geçîm zor o’
Rotoxê vaşan Mehmet Alî Baskin dîyar kerd ke nê demanê peyênan de debare zaf zor bîya û wina vat: “Ma nê karî nêkerê ma ça ra bîyarê? Ma wayîrê gedeyan ê, ma wayîrê zar û ziç ê. Nê gencî zewicîyayê, kîra bîya vay, mecbûr ganî bixebitî. Ma tena nê karî kenê. Ma sewbîna kar nêkenê. Ma zimistanî meywe roşenê. Mandalîna, porteqal…Nika zî nê vaşan roşenê. Mewsîmî ra mewsim ma bedilnenê. Geçîm zor o, zaf bîyo zor. 4-5 serrî yo zaf bîyo zor. Yew feqîr nêeşkeno cinîya xo bigîro şêro yew nan biwero. Yew yemeg bîyo 500-600 lîra.”
