Selahattîn Demîrtaş û Selçuk Mizrakli badê pêvînayîşan ewro înan reyde ameyê kerdene, bi raya avûkatanê xo mesajêk erşawit û wina ame vatene: “ Waştişê ma yo tewr gird vindertişê şerî û kiştiş o. Seba sîyaseto demokratîk çi destê ma ra bêro ma do bikerê.”
DEM Partî, CHP, EHP, EMEP, TÎP, TOP û temsîlîyetê DEM Partî, bi amancê pêvînayîşî Hemserekê Pêroyî yê HDP’yî yê verênî cû Selahattîn Demîrtaş û Hemşaredarê Şaristanê Girdî yê Amedî Selçuk Mizrakli verê cû ke caye ey de qeyûm amebî tayînkerdene virazê şîyê hepisxaneyê Edîrne. Serê nameyê heyetî de avûkatê Selahattîn Demîrtaş û Selçuk Mizrakli reyde pêvînayîş viraşt. Badê pêvînayîşî heyetî vernîya hepisxaneyî de eşkerayî da. Hemserekê DEM Partî yê Pêroyî Tuncer Bakirhan, serekê pêroyî yê partîyanê sîyasî, avûkatê Selahattîn Demîrtaş, rêxistinê DEM Partî yê Edîrne û xeylê welatî tewrê eşkerayî bîyê.
Eşkerayî de mesajê Selahattîn Demîrtaş û Selçuk Mizrakli ke bi raya avûkatan erşawitbî ame wendene. Mesaj Cagirê Hemserekê Pêroyî yê DEM Partî Ozlem Gunduz wend.
‘Bi vetişê qanûnan do vindertişê şerî domdar bibo’
Selahattîn Demîrtaş û Selçûk Mizraklı pmesajê xo de pêroyî şar û dostan rê selam kerdî û wina vat: “Ma xeylê baş ê û bimoral ê. Ma averşyayîşan nêzdî ra taqîb kenê. Ganî herkes bizano ke ma seba vejîyayîşê teberî rojan nêmarenê. Vistişê ma yê hepisxaneyî çiqas polîtîk o vejîyayîşê ma zî do wina bo. Hessasîyetê ma yo tewr gird vindertişê şerî û vindarnayîşê kiştişan bî. Ma nika no bi ca ardo. Ma hêvî kenê ke bi vetişê qanûnan na rewşe domdar bibo. La têkoşînê demokrasî do geş bibo û aver şêro.. Ma ça bibê zî seba bihêzkerdişê sîyasetê demokratîkî çi destê ma ra bêro ma do bikerê. Vurîyayîşê girdî vernîya Tirkîya de yê. Seba nê vurîyayîşî goreyê şarê ma û kedkaran virazîyê, hewceyî bi yewîyêk xurte yê têkoşînê est a. Ewro bi ameyîşê şima yê tîya zî nîşan dano ke do no têkoşîn her şertî de gird bibo. Naye ra ma yew bi yew sipasîyê xo partîyanê sîyasî kenê, selam û heskerdişê xo yê zerrî ra şawenê. Bi hêvîyêka ma ameyoxê azade de yewbînî bivinê.”
