Beyanatê Îmraliyî ke do ewro bêro dayene, do şaristananê Rojawanî sey Qamişlo, Hesekê û Kobanê de bi hewayêko gandar bêro temaşekerdene.
Heyetê Partîya Têduştî û Demokrasîye ya Şaran (DEM Partî) yê Îmraliyî ke Sîyasetmedarê kurd Ahmet Turk, Hemserekê Pêroyî yê DEM Partîye Tuncer Bakirhan û Tulay Hatimogullari, Parlamenterê DEM Partîye Pervîn Buldan, Sirri Sureyya Onder, Cengîz Çîçek û Endamê Buroyê Huqûqî yê Seserrî Faîk Ozgur Erolî ra pê yeno, ewro reya hîrêyin Hepisxaneyê Girawa Îmraliyî de Rayberê PKK’yî Abdullah Ocalanî reyde pêvînayîş keno. Pêvînayîşî ra pey Heyet do Stenbol de saete 17:00î de Otelê Elîte Worldî de mesajê Rayberê PKK’yî Abdullah Ocalanî şarî reyde pare bikero.
Mesajê Îmraliyî do Vakurê Kurdîstanî de Amed û Wan de bi girseyê bêro temaşekerdene. Silêmanîye de do Parka Azadîye ekranê girdî de bêro temaşekerdene. Rojawanî de şaristananê Qamişlo, Hesekê û Kobanê de do ekrananê girdan de bi girseyî bêro temaşekerdene. Girse Qamişlo de Stadyûma 12ê Adare, Hesekê de Parkê 4ê Nîsane de û Kobanê zî Qadê Jina Azad de do şar kom bibo û mesajî bi hewayêko gandar temaşe bikero.
