Endam û Verfekê Konseya Rayraberdişî yê PJAK’î Rêwar Abdananî da zanayîş ke Muhafizê Şorişî berpirsîyarê pêkewtişanê Kurdîstanî yê û heqê pawitişê cewherî heqêko qanûnî û rewa yo.
Endam û Verfekê Konseya Rayraberdişî yê Partîya Cuya Azade ya Kurdîstanî (PJAK) Rêwar Abdanan, hesabê xo yê fermî yê medya dîjîtal ê X’î ser o derheqê pêkewtişanê nê rojanê peyênan ê Rojhelatê Kurdîstanî de mesajêk pare kerd.
Verfekê PJAK’î Rêwar Abdananî eşkera kerd ke berpirsîyarîya nê pêkewtişanê ke Mehabad, Pawe û qezayanê bînan ê Kurdîstanî de bîyî, rasterast milê hêzanê terorîstan ê leşkeranê Muhafizanê Şorişî de yo.
Rêwar Abdananî dîyar kerd ke vera her hêrişêko ke serê miletê kurd û hêzanê PJAK’î de bêro kerdene, şuxulnayîşê heqê xopawitişê rewa, çi hetê Yewîneyanê Pawitişê Rojhelatê Kurdîstanî (YRK) ra û çi zî hetê hêzanê xorêxistinkerdayan ê şarî ra bibo, bi temamî rewa û qanûnî yo.
Erjeno merdim vajo ke nê hedîseyî ke mîyanê na aşme de qewimîyenê ke, Muhafizanê Şorişî yê rejîmê Îranî zaf reyî sînorê Mehabad, Merîwan û Bane bombarduman kerdbî; YRKyî zî eşkera kerdbi ke nê hêrişî bêcewab nêmanenî.
SewbînaCiwananê Welatperwer yê Kurdîstanî ewro bi eşkerayîyêk dîyar kerd ke înan şaristanê Pawe yê Rojhelatê Kurdîstanî de ceza daya 2 cerdewanan û di cerdevanê bînî zî bi giranî birîndar kerdî. Ame vatene ke nê di cerdevanî ke ameyî cezakerdene, destê înan şehîdbîyayîşê gerîlayanê azadîye de est bîyo û ê vera şarî xebitîyênî.
