Cinîyan ard ziwan ke qeyûm hemverê çareserî derbe yo û bi qeyûmî wazenê ke temsîlîyetanê demokratîk ê Kurdan orte ra wedarnê. Çareserî îttîfaqê bindestan o.
Dimayê tewqîfkerdişê Hemşaradaranê Mersînî yê Şaredarîya Akdenîzî Nûrîye Arslan û Hoşyar Sariyildiz û endamê Meclîsî Ozgur Çaglar, Neslîhan Orûç û Hîkmet Bakirhanî qaymeqamê qezayî Zeyyît Şener sey qeyûm ame tayînkerdene. Cinîyan ajansa JINNEWS’i rê ard ziwan ke amancê qeyûman vîndîkerdişê destkewteyanê cinîyan û şarê Kurdî yo. Û înan dîyar kerd ke ganî xoverdayîşêko hempar bêro kerdene.
‘Amanc vîndîkerdişê temsîlîyetanê demokratîk yê Kurdan o’
Hemsereka DEM Partî ya Bajarê Îzmîrî Fulya Erdogan dîyar kerd ke qeyûm xeyrhiqûqî bîyayîşî ra vete tasfîyeyêko sîyasî yo. Bi nê polîtîkayan çekûya ‘demokrasî’ pasîf verdanê û Tirkîya ver bi rayberîyêka otorîter benê.
‘Hedefê qeyûman destkewtêyê cinîyan î’
Fulya Erdogan vat ke sîstemê hemşaredarîye hem beşdarîya demokratîke zêde keno hem zî seba temsîlîyetê cinîyan modelêk o û tewqîfkerdişê hemşaredaran gamêka sîyasî ya ke destkewteyanê cinîyan hedef gêna. Aye vat: “Wayîrşîyayîşê cinîyan qada sîyaset û rayberîya herêmkî de gamêko muhîm o la no destkewte bi hewayêko sîstematîk yeno wedarnayîş û no nîşan dano ke îrade verba waştişê seypêyîya komelkî de çi helwêstî gêno.”
“Hêrîşê ke verba cigêrayîşê aştî û çareserîye beno”
Fulya Erdogan dîyar kerd ke qeyûm tena zerar nêdano xoserîya rayberîya herêmkî zerar dano cigêrayîşê aştî û çareserîye zî û va: “Heta ke waştişê viraştişî çareserîye yê şarî yeno şiknayene, ecizîya komelkî hîna xorîn bena, seba aştî hêvîyê qels benê. Hemverê aştî astengo tewr gird, sîyaseto demokratîk ra teberkerdişê şarî yo. Heta ke hukmat bi polîtîkaya qeyûmî na mudaxeleya vera îradeyê şarî bido dewamkerdene, ne aştî ne zî aramîya komelkî mumkin bena.”
‘Ganî ma îtîfaqê bindestan awan bikê’
Endama Mor Dayanişma Sîbel Orkmezî va ke şarî weçînayîşanê herêmkî de cewabêko pêt dayo û hukmatî nêeşkayo nê biwedaro û coka bi qeyûman hem hukmê xo yê faşîstî mojneno hem zî heyfê xo gêno. Orkmezî îlawe kerd: “Vera naye ma ganî îtîfaqê bindestan awan bikê ke cinî zî tede yê. Çunke xelisîyayîş tena nêbeno, yan ma heme pêro pîya yan zî ma kesêk zî çin ê.”
‘Ganî xebatkarî xebata qeyûmî reyde qebul nêkê’
Hacer Yeşîlçaya ke Cinîyanê Antîkapîtalîstan ra ya ard ziwan ke qeyûm hemverê heqê weçinitişî derbeyêk o. Yeşîlçay wina dewam kerd: “Qeyûm xespkerdişê serkewtişê mûxalefetî yo û nêşinasnayîşê îradeyê şarê Kurdî yo. Dewlet binpaykerdişê heqanê Kurdan xo rê sey rêbazêko rehet vînena û goreyê menfeetanê xo nê kena. Ganî no rêbaz heme hetan ra bêro redkerdiş. Demanê peyînan de grevanê karkeran zaf vînenê. Karkerî rayîr mojnenê ma. Û ganî nê hêrişî hetê xebatkaran ra nêrê qebulkerdiş û ganî xebata bi qeyûmî reyde qebul nêkê.”
