Temsîlkarê TÎHV’î yê Amedî avûkat Murat Aba derheqê veşnayîşê çekan ê PKK’yî de qisey kerd û wina vat: “Bi hezaran gerîlayî est ê. Ganî bi rehetî bieşkê bêrê keyeyê xo û bieşkê sîyaset bikerê. Seba ney zî ganî bi lez, komîsyonêk bêro awankerdene û qanûnî bêrê viraştene.”
Rayberê Şarê Kurdî Abdullah Ocalan 9ê temmuze de çarçewaya “Prosesê Aştî û Komelê Demokratîkî” de vengdayîşêko newe kerd. Nê vengdayîşî ra pey Grûba Aştî û Komelê Demokratîk a PKK’yî ke 30 kesan ra ameyêne pê, 11ê temmuze de Eşkefta Casene ya şaristanê Silêmanî yê Herêma Federe ya Kurdîstanî de bi merasîmêk çekê xo veşnayî. Temsîlkarê Weqfa Heqanê Merdiman a Tirkîya (TÎHV) yê Amedî avûkat Murat Aba derheqê veşnayîşê çekan ê PKK’yî û proseso nikayîn de qisey kerd.
Murat Aba ard vîr ke meseleyê kurdî se serrî ra zafêr o ke dewam keno û wina vat: “Kurdî vanê ma zaf ê, heqê ma zî est ê. La heta nika hetê dewlete ra heqê kurdan nêameyê qebulkerdene. Seba ke kurdî wazenê heqanê xo bigîrê, 50 serrî yo şerêk dewam keno. La 50 serrî ra pey 11ê temmuze de 30 gerîlayan çekê xo veşnayî. Nê çekî binê çimdarîya sazgehanê sivîl, rojnameger û partîyan de bi. Sekreterê ma yo Pêroyî Coşkun Ustercî zî uca de bi. Lîsteya çekê ke ameyê veşnayene dayê OHD, ÎHD û weqfa ma. Na gamêka tarîxî ya û 52 serran ra pey ameya eştene. Nê semedî ra ma bi hêvî yê. La tena hêvîkerdiş reyde nêbeno ganî merdim bingeyê nê amade bikero.”
‘Ganî bi lez qanûnê neweyî bêrê viraştene’
Murat Aba dîyar kerd ke nê 52 serranê peyênan de xeylê heqê şarê kurdî ameyê binpaykerdene û wina dewam kerd: “Kurdan îşkence dî, dewê înan ameyê veşnayene, serra 2015î de dewan ra pey şaristanî zî ameyê veşnayene. Eke aştîyêk, cuyêka seypê nêra awankerdene, ne kurdî ne zî tirkî bi rehetî nêeşkenê bihêvî biciwîyê. Nê semedî ra Serekê PKK’yî Abdullah Ocalan bi xo prosesêk da destpêkerdene û nê ser o ra zî çekî ameyê veşnayene. No seba ma çîyêko muhîm o. Ganî Rojhelatê Mîyanênî de problemî bi çekan nê, bi qiseykerdiş û qanûnan bêrê çareserkerdene. Veşnayîşê çekan gamêka ewil a. Bi nê heme çî nêqedîyeno. Ganî qanûnan de heqê kurdan bêrê pawitene. Bi qanûnê Vera Terorî (TMK) bi hezaran kurdan seba ke heqê xo waştê, hepisxaneyan de yê. Ganî bi lez qanûnê neweyî bêrê viraştene û TMK wirzîyo. Şarê kurdî qalêk bikero, vanê rêxistine pawenê û înan bi ceza kenê. Reyna nika zî qeyûmî est ê. Hem DEM Partî ser o hem zî CHP ser o.
Murat Aba dewamê qiseykerdişê xo de nê çîyî vatî: “Bi hezaran gerîlayî est ê. Ma zanê le zafaneyî înan Vakurê Kurdîstan û Tirkîya de yê. Ganî bi rehetî bieşkê bêrê keyeyê xo, şaristanê xo û bieşkê sîyaset bikerê. Derdê înan o nîyo ke şer qedîya bêrê keye de ronişê. Qiseykerdişan de zî ame vatene ke, ‘Ma wazenê sîyaset bikerê.’ Nê semedî ra na rewşe de eke çekan ronê û bêrê welat do bêrê girewtene. Ganî Komîsyonê Meclîsî de qanûnî bêrê viraştene ke kesê ke ameyê, nêrê girewtene. Seba nê zî ganî bi lez 10-15 rojan de Meclîs de komîsyonêk bêro awanekerdene. Mi qiseykerdişê Recep Tayyîp Erdoganî zî goşdarî kerdê la ma wazenê çîyêk bivînê. Ka se kerdo, senî bi? Ganî dewlete gamêke bierza.”
Avûkat Murat Aba dîyar kerd ke ganî girewteyê nêweşî zî veradîyê.
