Muxtarê 5 dewanê ke projeyê JES’î tede amêne kerdene, vizêrî Qeymeqamê Gimgimî reyde pêvînayîşêk kerd. Qeymeqamî waşt ke çadirî bêrê wedartene û çalekî bêro qedênayene. Labelê şarê Gimgimî vano ke: “Hata ke ma dest de belgeyo resmî nêbo, ma çalakîya xo nêqedênenê.”
Muxtarê 5 dewanê ke projeyê JES’î (Santralê Enerjîya Jeotermal) tede amêne kerdene, vîr de Qeymeqamê Gimgimî reyde pêvînayîşêk kerd. Qeymeqamî waşt ke çadirî bêrê wedartene û çalekî bêro qedênayene. Labelê şarê Gimgimî kombîyayîşê xo de eşkera kerd ke: “Hata ke ma dest de belgeyo resmî nêbo, ma çalakiya xo nêqedênenê.”
Muxtaran qeymeqamî ra belgeyê resmî waştî
Dewê Çalîdereyê Gimgimî de xoverdayîşê çadiran roja 10. de dewam keno. Qeymeqamê Gimgimî Abdulkadir Işikî seba qedînayîşê çalakîye 5 muxtaran reyde qisey kerd. Goreyê agahîyan; Qeymeqamî vato ke: “Îznê ruhsetê 10 quyuyan ra yê 9 heban qedîya, nê fîrmayî nê cayan de nêşixulîyenê. Tena herêma çadiran de îzna yew quyuye menda, na fîrma zî do xebata xo bianco cayêko bîn.”
No mabên de qeymeqamî muxtarî tehdît kerdî û vat: “Çadiran wedarê, eke şima nêwedarê ma do mudaxele bikê.”
“Çadir tena hewşê nîya, îradeya şarî ya”
Nê qiseyan ser o Gimgimijan yew kombîyayîşê şarî viraşt û bi eşkerayîyêka nustekî netîceyê kombîyayîşî pare kerdî. Eşkerayîye de nê xusûsî ameyî vatene:
* Heta ke nuşteyêko resmî nîro, çadirî nêşonê.
* Rojanê 19, 20 û 21ê Gulane de do xoverdayîşê ekolojîkî hîna pîl û bi vîzyonêko hîna hera bêro kerdene.
* Çadirî tena seba rakewtene nîyê; Çadirî temsîlê îradeyê komeleyê, pîyaşîyayîş û omidê ameyoxî yê.
“Ameyoxê xo rê wayîr vêjîyayîş”
Temsîlkarê şarî û Platformê Ekolojî yê Gimgimi dîyar kerd ke 19, 20, 21ê Gulane seba înan “mîlad” o. Na eşkerayîye de veng dayî pêro Gimgimijan ke nê rojan de bêrê mewzîyanê çadiran. Hetê bînî ra kombîyayîş de birîyêka winasî ameye girewtene:
“Seba girewtena belgeyê resmî, yew ‘Grûba Diyalogî’ yena awankerdene. Na grûbe do Qeymeqamîye û Walîtîye ra randevu biwazo û qisey bikero.”
Eleqeyê şarî nîşan dano ke Gimgim de no xoverdayîşê ekolojîkî do rojanê ameyoxan de hîna germ bîbo.
