Wendekarê unîversîteyan seba xebatanê ziwanî binê sîwanê TEV-KOM’î de ameyê têhet, bale ante serê polîtîkayanê asîmîlasyonî yê vera kurdkî û dîyar kerd ke seba ke kurdkî bibo ziwanê fermî û aver şoro do xebatanê xo zêde bikerê.
Têgêrayîşê Komeleyane Wendekaran ê Kultur û Ziwanê Kurdkî (TEV-KOM) bi deklarasyonêke ronayîşê xo Merkezê Kulturî yê Yaşar Kemal ê Maltepe yê Stenbolî de îlan kerd. Bi desan grûb û qlubê ziwanê kurdkî yê unîversîteyan ameyê têhet. Wendekaranê ke tewrê programê îlankerdene bîyê ajansê ma rê qisey kerd.
‘Ganî ciwanî vera asîmîlasyonî baldarî bê’
Fatma Gunduz dîyar kerd ke unîversîteyan de grûbê kurdkî bîbî û binê sîwanê TEV-KOM’î de ameyê têhet û wina dewam kerd: “TEV-KOM’î reyde do xebatê ma xurtêr bibê. Ma ciwanan mîyanê komelî de hêzêko tewr xurt vînenê. Ameyoxê komelî zî ciwanî dîyar awan kenê. Naye ra xebata ziwanî zî nika ciwanî aver benê. Tewr zêde zî cinîyê ciwanî mîyanê na xebate de ca gênê. Ma zanê sîstem seba komelî asîmîle bikero, polîtîkayanê xo serê ciwan û cinîyan de rayrabeno. Vera polîtîkayanê asîmîlasyonî ganî ciwanî baldarî bê.”
‘Ma wazenê kurdkî bibo ziwanê fermî’
Gunduz vîr vist ke ciwanan her tim komelî rê pêşengî kerda û wina vat: “Tarîx de zî dîyar o ke ciwan pêşengê komelî yê. Ewro TEV-KOM zî seba nê yeno ronayene. Ma wazenê ke ziwanê kurdkî bibo ziwanê fermî. Wendegeh û unîversîteyan de bibo ziwanê dersan. Ganî ziwanê kurdkî heme warê zanistî de bêro xebitîyene. TEV-KOM ziwanê kurdkî rê statu wazeno. Xebatê ma seba ey do dewam bikerê.”
‘Ma wazenê bi ziwanê xo azad biciwîyê’
Endamê METU-KURDÎ Jiyan Bahadir zî vîr vist seba ke ma zanê pîyabîyayîş ma bihêz keno û nê çî ardî ziwan: “Ma do pîya xurtêr seba kultur û ziwanê xo bixebitîyê. Na serrêka ma ODTU de xebatanê ziwan û kulturî kenê. TEV-KOM’î reyde ma do xebatanê xo xurtêr bikerê. Nika ra tepîya ma sey TEV-KOM’î seba ziwanê xo zêdetir bixebitîyê. Ma seba kurdkî azadî wazenê. Ma wazenê bi ziwan û kulturê xo azad biciwîyê.”
‘Ma do seba averberdişê ziwanî grûban awan bikerê’
Wendekar Fatîh Demîrboga dîyar kerd ke TEV-KOM seba wayîr vejîyayîşê ziwan û kulturê kurdkî ameyo ronayene û vat: “Ewro ciwanê unîversîteyan ameyê têhet. Ma wazenê ziwanê xo aver bêrê. Bi desan grûbê unîversîteyan seba ziwanê kurdkî ameyê têhet û binê sîwanê TEV-KOM’î de wayîrê ziwanê xo vejîyenê. Ma do seba averberdişê ziwanê kurdkî unîversîteyan de grûban awan bikerê.”
