Hemsereka Pêroyî ya DEM Partî Tulay Hatîmogullarî kombîyayîşê partîya xo de vat ke ganî êdî proses bi eştişê gamanê şênber ê qanûnîyan bêro garantîkerdene û vat: “Eke şima meseleyê kurdan sey ‘teror’ pênase bikerê şima do tena xo bixapênê. Seba aştîya domdare ganî statuyê birêz Ocalanî bi hewayêko huqûqî bêro garantîkerdene.”
Hemsereka Pêroyî ya DEM Partî Tulay Hatîmogullari kombîyayîşê partîya xo yê Meclîsî de derheqê hedîseyanê rojevî de qisey kerd. Tulay Hatîmogullari sere de bi munasebetê 21ê Sibate Roja Ziwanê Dayîke ya Dinya bi ziwanê xo yê dayîke, erebkî qisey kerd. Tulay Hatîmogullari qiseykerdişê xo de bale ant zengînîya ziwananê Tirkîya ser o û vat ke ziwanê dayîke şaran gandar keno û ganî heqê ziwanê dayîke seba heme ziwanan bêro caardene. Tulay Hatîmogullari dîyar kerd ke tu ziwanî çin ê ke nêyenê zanayene û wina vat: “Bi mîlyonan kurdî keyeyanê xo de bi kurdkî qisey kenê. Coka caardişê heqê perwerdeyê bi ziwanê dayîke muhîm o. Bê caardişê heqê perwerdeyê bi ziwanê dayîke demokrasî nêyena ca.”
‘Feqîrîye qeder nîya’
Hatîmogullarî vat ke Tirkîya de feqîrîye û nêseypêyîya komelkî ya girde est a û vat: “Welatijî nêeşkenê debara xo bikerê. Sebebê feqîrîye bi xo îqtîdar o. Aşma Remezanî de welatijî hewcedarîyanê xo nêeşkenê bîyarê ca la hemparê qesrî sifreyo zengîn ser o fitar kenê. Ganî na rewşe bilez bivurîya. Eke çimeyê nê welatî seypê bêrê parekerdene feqîrîye do biqedîya.”
Meselayê ciwanan
Hatîmogullarî vat: “Ciwanî nêeşkenê debara xo bikerê û ameyoxê xo bivînê. Bi taybetî cinîyê ciwanî hîna zaf meseleyan reyde rî bi rî yê. Ciwanê LGBT+ binê tedayanê giran de yê. Ma sey DEM Partî vanê ganî seba ciwanan heqê înternetê bêpere bêro dayene. Ciwanî unîversîteyanê azad wazenê, aştî wazenê, heqê perwerdeyê bi ziwanê dayîke wazenê.”
Raporê hempar ê komîsyonî
Hatîmogullarî derheqê raporê hempar ê komîsyonî de wina vat: “Mesajê birêz Ocalanî de wina ame vatene, ‘Ma do pîya senî biciwîyê? Ganî ma na babete munaqeşe bikerê.’ Ganî qanûnê ke prosesî garantî bikerê bilez bikewê merîyet. Raporo hempar kêmaneyê xo est ê, ziwanê raporî bi nêzdîbîyayîşo verên ameyo hazirkerdene. Eke şima meseleyê kurdan sey ‘teror’ pênase bikerê şima do tena xo bixapênê. La pêşnîyazê qanûnî û demokratîkbîyayîşê ke raporê hempar de yê, eke bikewê merîyet eşkenê zemîn awan bikerê.”
Hatîmogullarî vat ke ganî seba caardişê nê qanûnan cejna rê pawayîş nêbo û Meclîs lez dest bido binê kerra. Hatîmogullarî waşt ke Selahattin Demîrtaşî, girtîyê sîyasîyî û serekşaredarê ke ca de înan de qeyûm ronîyayo lez bêrê verdayene.
‘Seba haştîya domdare ganî statuyê Birêz Ocalanî bêro garantîkerdene’
Hatîmogullarî peynîya qiseykerdişê xo de wina vat: “Birêz Ocalanî û Têgêrayîşê ey seba aştî gamê le hewce kenê, eştê. Ganî dewlete zî goreyê nê vengdayîşî bi eştişê gaman proses bêro merhaleyêka newîye. Ganî çareserkerdişê ne sîyasetê emnîyetî de la demokrasî û huqûqî de bivînê. Meseleyê kurdan sey ‘teror’ nê zemîna hemwelatîya seypê ser o bêro çareserkerdene. Qiseyî nê, ganî gamê şênber ê qanûnî bêrê eştene.”
