Şaredarîya Amedî ya Şaristanê Girdî vera kêzik û melşeyan de xebatanê dermankerdişî yê zimistanî kena ke hamnanî zaf nêbê.
Şaredarîya Amedî ya Şaristanê Girdî bajar de vera kêzik û melşeyan de bi hedefê %100 serkewtişî xebata dermankerdişê zimistanî ya hîraye daye destpêkerdene.
Serekîya Daîreya Karê Weşîye, seba ke kêzik, melşe, pîrik, meqesek, qijnike û ûsn sewîyeya ke nêbo tehdît û seba weşîya însanan de bimano û nêweşîyê sey tîfo, kolera, dîzanterî, û birînê şerqî ke înan ra eşkenê vila bibê, bi metodanê zanistîyan dermanan kena. Na çarçewa de ekîbê ke aşmanê hamnanî de dermankerdişî kerdêne, nika zî dest bi xebatanê dermankerdişê zimistanî kenê.
Xebatê dermankerdişî yê zimistanî bi 290 personel, 68 wesayit, 380 makîne û hacetanê cîya-cîyayan 17 qeza û 1046 taxanê merkezîyaan de yenê kerdene.
Serekê Daîreya Weşîye Vahap Saçakliyî melumat da û va “Ma sey Şaredarîya Şaristanê Girdî reya verêne planê xebata zimistanî ya bêvindertiş kerda. Xebata zimistanî ê cayan de ke nê kêzikî îstîrehet kenê, cayan de ke zêde benê sey bodrûm, kanalê akerde û padeyeyî, logarî û ê cayan de ke zimistanî varişî ra awe kom bena, yena kerdene. Bi saya xebata zimistanî êdî hamnanî de kêzik û melşeyî do sey verê nêbê.”
Saçakliyî qeyd kerd ke dermano ke şuxulnenê zerar nêdano canweranê bînan û wina va: “Ma bi taybetî nê dermanan weçînenê. Weşîya şarê ma seba ma qîymetin a.”
