Westeyê tewr peyên yê kerra bazaltî Nurettîn Medyelîogullari, cayê xo yê 8 metrekareyî de bi kerraya bazaltî bi seyan eser vejneno werte, Medyelîogulları vat ke kerra bazaltî ra şekîldayiş zehmet o
Nurettîn Medyelîogullari peynîya teqawûdbîyayişî, destpê hunerê darên, paxir û bronzî kerdo. Peynî zî destpê şekîldayişê kerra bazaltî kerdo. Medyelîoglu dikanê xo yê 8 metkareyî de bi seyan eser vejneno werte û hîna zafêr eserê rojane virazeno.
Goreyê rojnameyê Yenî Ozgur Polîtîkayî armancê Nurettîn Medyelîogullariyî, no hunerî de resnayişê wendekaran o û wina vat: “Mi di ray Merkezê Perwerdeyê Şarî, rayêk zî Weqfê MEKSA’yî de kurs akerd. Nê kursan ra ciwananê cinî û camerd elaqa nîşan dayê. Xususî ciwanê cinî eserê weş viraştê la peynîya kursî çew elaqa no hunerî ra nîşan nêda. Eke îmkanê ciwanan seba ronîyayişê kooperatîfî bibînê do ciwanan eşkîyaynê pereyî zî qezenc bikerê la nê projeyê ma nêbî.”
Sozê xo de nêvindertê
Nurettîn Medyelîogullari aşkera kerd ke Walîyê Amedî Hasan Basrî Guzeloglu û Alî Îhsan Su soz dayê la sozê xo de nêvindertê û wina vat: “Mi ra vatê; ma ewta to rê tahsîs bikerê, ti zî wendekaran biresnî û wendekaran zî nê eserê pêşkêş bikerê. Peynî zî wendekar pere qezenc bikerê. Mi zî va temam la peynî musayo ke ca dayê Odeya Cewherroşî ra.”
Mi ra pey do biqedîyo
Medyelîogullari dîyar kerd ke westeyê şekîldayişê kerraye zaf bi kêm ê û wina domna: “Nika şaristan de tena 4 westayî no hunerî de elaqadar benê, mi ra pey do no huner biqedîyo. Ez wazena westeyan biresnî û nê westa zî no hunerî ra do pere qezenc bikerê. Ez xeyal kena û zaf wazena ke eserê xo pêşkêş bikera. Viraştişê nê hunerî ra ez zaf bi kêfweş bena û ez tena silgirê murç û çakuç reyde şuxilnena. Mi tena murç û çakuçî reyde mînyaturê Mînareya Çarlingî viraşt, ray ray seba eserêk 7 aşmê xebityena. Dormeya na şaristanê qedîm a, kerrayê weş estê. Bi na xebate xo terapî kena. No karî de sebir zaf muhîm o.”
