Amed – Koma Amed ku dê piştî 30 salan di 25ê Cotmehê de li Amedê konserekê li dar bixe li balafirgeha Amedê bi girseyî hatin pêşwazîkirin. Endamê komê Suleyman Çarnewa keyfxweşiya xwe ya ji bo pêşwaziyê anî ziman û got: “Aştî û azadî ev e.”
Koma Amed yek ji komên ku tevkarî li muzîka Kurdî kiriye ye. Her stranên komê ji aliyê bi sed hezaran kesan ve tê guhdarkirin. Koma Amed dê piştî 30 salan li Amedê di 25ê Cotmehê de li Qada Newrozê ya Amedê konserekê li dar bixe. Konser bi pêşengiya Şaredariya Bajarê Mezin a Amedê, Sanatça Organîzasyonê û Şaredariya Peyasê, bi dirûşma “Kulîlkên Azadiyê Pêşwaziya Aştiya Civakî Dikin” dê bê lidarxistin. Amadekariyên konserê didomin. Her kolanên Amedê bi afîşên vexwendina konserê ve hatiye xemilandin.
Kêliyên hestiyar çêbûn
Endamên Koma Amedê ku hatin balafirgeha Amedê, ji aliyê Hevşaredarên Peyasê Berîvan Gulşen Sîncar û Cengîz Dundar, endam û rêveberên saziyên çandê û gelek kesan ve bi girseyî û kulîlkan hatin pêşwazîkirin. Endamên komê yên bi girseyî û coş hatin pêşwazîkirin nekarîn hêsirên çavên xwe bigirin û keyfxweşiya xwe anîn ziman.
‘Pir kêfxweş in ku li Amedê ne’
Endamê komê Suleyman Çarnewa yê li vir axivî, diyar kir ku ew hêvî dikin tevahî hunermendên Kurdistanê werin vir û got: “Em pir kêfxweş in ku piştî 30 salan em hatin Amedê. Em spasî her kesî dikin. Aştî û azadî ev e.”
Serdanên wan dê bidomin
Piştî pêşwazîkirinê endamên komê derbasî Şaredariya Bajarê Mezin a Amedê bûn. Endamên komê dû re dê serdana Şaredariya Peyasê bike û pişt re jî danê êvarî dê li Amedstoreyê formayên Amedsporê îmze bikin.
