Amed – Koma Amed piştî balafirgeha Amedê hat pêşwazîkirin paşê hat serdana Şaredariya Bajarê Mezin a Amedê. Hevşaredar Serra Bucak diyar kir ku ev der mala wan e û got: “Ji bo konserê gelê Kurdistanê û Tirkiyeyê amade ye.”
Koma Amed ku dê piştî 30 salan di 25ê Cotmehê li Qada Newrozê ya Amedê konserekê li dar bixe li balafirgehê bi girseyî hate pêşwazîkirin. Endamên komê piştî li balafirgehê hatin pêşwazîkirin serdana Şaredariya Bajarê Mezin a Amedê kirin. Li vir koma ku Hevşaredarên Bajarê Mezin ên Amedê Serra Bûcak û Dogan Hatûn di nav de endamên komê pêşwazî kirin. Endamên komê diyar kirin ku ew gelek keyfxweş in ku hatine Amedê.
Hevşaredar Serra Bûcak a li vir axivî jî wiha got: “Hûn bi xêr hatin ser axa xwe. Ev der welatê we ye. Ev der mala we ye. Em jî gelek keyfxweş in. Spasiya kesên organîzator dikin. Piştî 30 salan hûn hatin vir. Gelê Kurdistan û Tirkiyeyê ji bo konserê amade ye. Piştî hûn weke kom hatin gelhev, pêvajoya aştiyê jî dest pê kir, ev jî gelek giring e û sembol e.”
Endamên komê tîşortên ku “Koma Amed” li ser dinivîsî diyarî hevşaredaran kirin. Hevşaredaran jî formayên Amedsporê diyarî endamên komê kirin.
Koma Amedê piştî Şaredariya Bajarê Mezin a Amedê serdana Şaredariya Peyasê kir. Li wir jî bi girseyî û dilgermî hate pêşwazîkirin. Girseya ku Hevşaredar Berîvan Gulşen Sîncar û Cengîz Dundar di nav de bi kulîlkan kom pêşwazî kirin. Endamên Koma Amedê li hemberî vê pêşwazîkirina dilgerm keyfxweşiya xwe anîn ziman.
Koma Amedê dû re danê êvarî dê li Amedstorê formayên Amedsporê îmze bike.
