Platforma Jinan a Dîcle Amedê têkildarî kuştina Bahar Aksu daxuyanî da û diyar kir ku kujer bi piştgiriya dewletê jinan dikujin û ew ê li dijî vê têkoşîna xwe berfirehtir bikin.
Li Stenbolê duh Îhsan Elîbol û sê hevalên wî xwestin ku Bahar Aksu birevînin. Bahar Aksu li ber xwe da di encama vê yekê de Îhsan Elîbol ew kuşt. Piştî bûyerê jin li gelek bajaran daketin qadan û kuştina Bahar Aksu şermezar kirin. Li Amedê jî bi pêşengiya Platforma Jinan a Dîcle Amedê (DAKAP) li Qada Şêx Seîd daxuyanî da û kuştina Aksu şermezar kirin. Jinan pankarta ” Em ji bo Bahar Aksu û hemû jinên ku hatine qetilkirin li qadan in” vekirin. Di daxuyaniya de endam û rêveberên DEM Partî, DBPê, CHPê, saziyên jinan û gelek jin tev li bûn.
Sekretera Egîtîm Senê a Hejmara 1an Arzu Koç daxuyaniyê xwend.
Arzu Koç diyar kir ku îro ew li vir in ku careke din dibêjin ew ê têkoşîna xwe li dijî kujerên ku Tirkiyeyê kirine welatekî ku kuştina jinan hema bêje asayî bûye nîşan bidin û dê her li dijî kuştinan têbikoşin. Arzu Koç anî ziman ku mêr bi hêz û piştgiriya dewletê jinan dikujin û her jinek tê kuştin li pey xwe hêviyek mezin dihêle û ew hêviya wan dibe parçeyek têkoşîna jinan.
‘Em ê têkoşîna ji bo civakeke demokratîk û azadiya jinan bidomînin’
Arzu Koç da zanîn ku desthilat “sala malbetê” îlan kiriye lê jin tên kuştin û got: ” Li gorî daneyên SAMERê di 3 mehên destpêkê yên sala 2025an de 98 jin hatine qetilkirin, 156 jin bi awayekî gumanbar jiyana xwe ji dest dane, 207 jin bi tundiyê û birîndarkirinê re rû bi rû man e, 41 jin bi destdirêjiyên cinsî re rû bi rû man e, 5 jin jî bi tecawizê re rû bi rû hatine hiştin. Piraniya kuştinan ji aliyê hevjîn an jî hevjînê berê ve tên kirin. Dîsa piranîya kuştinên li malan pêk tên. Divê jinên hemû bi hev re li dijî vê zilmê têbikoşin. Çimkî ev kuştin li dijî hemû jinan e. Em soz didin her jineke ku di tê kuştin, em ê têkoşîna ji bo civakeke demokratîk û azadiya jinan bilind bikin.”
Daxuyanî bi berzkirina dirûşma “Jin Jiyan Azadî” bi dawî bû.
