Ciwana enternasyonalîst Lena Sophie Schneider ku ji bo piştgiriya Rojava hatibû Bakûrê Kurdistanê balkişand ser heybetiya têkoşîn û berxwedana gelê Kurd û wiha got: “Dema li Nisêbînê ciwanan ew sînor hilweşandin û tevlî berxwedana Rojava bû ez gelek bi bandor bûm.”
Ciwanên enternasyonalîst yên ji Almanyayê bi boneya piştgiriya berxwedana çalakiyên ji bo Rojavayê Kurdistanê hatibûn Bakurê Kurdistanê bi gelek sazî û dezgehan re hevdîtin pêk anîn. 15 ciwanên ku ji saziyên weke Koma Xebatên Enternasyonalîzmê ya Hannoverê, Ciwanên Çep–Solid, Ciwanên Demokratîk ên Yewnan, Keçên Demokratîk ên Rozalîa, Federasyona Rêxistinên Têkoşerên Çîna Civakî, Sazîbûna Komûnîst pêk dihatin di çarçoveya xebatên xwe de dema ku ji Nisêbînê diçûn Mêrdînê li ser reya Qoserê ji hêla polîsan ve hatibun binçavkirin. Ji ciwanên hatine binçavkirin piştre hatin dersînorkirin û bi balafirê şandin Almanyayê.
‘Ji bo dîtina têkoşîna gelê Kurd hatim’
Ji ciwanên hatî binçavkirin Lena Sophie Schneîder tekildarî berxwedana Rojava û gelê Kurd ji ajansa me re axivî û balkişand ser berxwedana gelê Kurd û dostên wan a kûrevî. Lena Sophie Schneîder çavdêriyên xwe yên Kurdistanê û li ser têkoşînê anîn ziman û xwesteka xwe ya tevlêbûna vê berxwedanê vegot. Schneîder destnîşan kir ku ew wek civanekî enternasyonal li başurê Almanyayê ji bo berxwedana gelê Kurd di cih de bibîne hatiye bakurê Kurdistanê.
‘Ciwanê ku sînor hilweşandin’
Têkildarî helwesta ciwanên Kurd a têkoşer Schneîder hestên xwe anîn ziman balkişand ser heybetiya berxwedana gelê Kurd. Schneîder di berdewama axaftina xwe de wiha got: “Me dixwest vê pevajoya tê meşandin di cihê wî de bişopînin. Lê me dît ku li dijî Rojavayê Kurdistanê şerekî giran tê meşandin. Her wiha me dît ku li her çar parçeyên Kurdistanê berxwedanek bêhempa û xurt tê meşandin. Dema li Nisêbînê ciwanan ew sînor hilweşand û tevlî berxwedana Rojava bu ez jî gelek bi bandor bûm. Daxwaza min jî ew bu ku ez bi wan ciwanan re li ser vê berxwedanê biaxivin.”
‘Siyaset û medyaya Alman bêdeng ma’
Têkildarî rewşa Sûriyê û êrişên li ser Rojavayê Kurdistanê jî Schneider da zanîn ku dema şerê li dijî Rojava dest pê kir, siyasetmedar, medya û dewleta Almanyayê bêdeng maye û wiha axivî: “Dema êrişan li li dijî Rojava dest pê kirin ji hêla Almanyayê ve tu peyv an axaftinek nehat kirin. Em vê yekê pir zelal dibînin ku dewleta Almanyayê jî berjewendiya xwe di nav vê pêvajoyê de dibîne. Ew naxwazin Suriye wek netewdewlet bibe yek. Divê Sûriyek demokratîk bê avakirin.”
‘Gelê Kurd li dijî polîtîkayên emperyalîst têdikoşe’
Schneîder anî ziman ku Amerîka, Almanya û dewletên din hemû dixwazin li Rojhilata Navîn li gorî berjewendiya xwe tev bigerin û ev tişt gotin: “Lê em dibînin ku berxwedana gelê Kurd pir xurt e li hember van polîtîkayan. Li gelek bajaran meş tên li dar xistin û tevlîbûyin jî gelek xurt e. Di heman demê de li gelek bajar û welatan jî gelên cîhanê bi gelê Kurd re tevlî meşan dibin û bertekên xwe tînin ziman.”
