Siyasetmedara Kurd Leyla Zana bi gotina, “Ez di şexsê Serok Apo de cejna we pîroz dikim” Newroza gel pîroz kir û bang pêşxistina yekîtiya gelê Kurd kir. Li Newrozê peyama Serokê Giştî yê Partiya DEVAyê Alî Babacan jî hate xwendin.
Siyasetmedara Kurd Leyla Zana di Newroza Amedê de axivî û Newroza gel pîroz kir. Zana wiha got: “Amed, we bi sekna xwe bereket anî. Newroz pîroz be. Ji vir gelek peyam hatin dayîn. We ji bo Rojava jî sekneke xurt nîşan da. Gelê Kurd bi sekna xwe peyama xwe da siyasetmedaran, em yek in, Kurd in û weke gelên din xwedî maf in. We peywîra xwe bi cih anî. Divê siyaseta Kurd jî erka xwe pêk bîne. Ez dixwazim ji hikumetê re jî çend gotinan bejim, salek û nîv e hûn daxwaza vî gelî pêk naînin. Gel dixwaze Serok li Amedê bibîne. Ji ber ku dixwazin pêşerojê bi hev re ava bikin. Di kesayeta Rêber Apo de Newroza hemû girtiyan pîroz dikim. Di nav xêr û xweşiyê de bimînin. We sekneke xurt diyar kir. Cîhan hemû we temaşe dike. Di nava xweşiyê de bimînin, azad bijîn û her tim li ser pêyan bin.”
Babacan: Bi hêviya pêşerojek demokratîk
Li Newrozê peyama Serokê Giştî yê Partiya DEVAyê Alî Babacan jî hate xwendin. Babacan Newroza gelê Kurd pîroz kir û wiha got: “Newroz mizginiya biharê ye, Newroz sembola jiyana hevpar û wekhev e. Em hêvî dikin ku di nav hawirek bi aram û ku herkes dikare xwe bi awayek demokratîk îfade bike, jiyanek hevpar ava bikin. Bi van hestan ez di hizûra hemû Amediyan de Newrozê li pîroz dikim. Newroza we pîroz be.”
Zinar Sozdar derket ser dikê
Peyama Serokê Giştî yê CHPê Ozgur Ozel jî hate xwendin. Li dû peyaman Hunermend Zinar Sozdar derket ser dikê û kilam stirîn. Newroz bi performansa Zinar Sozdar didome.
