Îsraîl û DYAyê piştî hedefên leşkerî, îstîxbarî û ewlehiyê yekem car li tora enerjiyê ya Îranê dan. Di encama êrişan de li gelek bajarên Îranê şewat bi bîr û depoyên petrolê ket. Gelek bajar di bin dûmanê de man û li Tehranê agir bi petrola ji bîran herikî nave kuçeyan bû. Îsraîlê diyar kir ku di 24 seatan de li 400 hedefan dane, rêxistinên civakî daxuyandin ku di ji duh ve 33 sivîlan jiyana xwe ji dest dane û saziyên tenduristiyê yên Îranê ji ber dûmana petrolê hişyariya asta qirêjbûna hewa û tedbîran kirin. PENê rejîm ji bo girtiyên siyasî hişyar kir.
Şerê Îsraîl, DYA û Îranê di roja 9emîn de berdewam dike. Îsraîl û DYAyê di 24 saetên dawî de êrişên xwe zêde kirin. Îranê jî ligel ku Serokwezîr Mesûd Pezeşkiyan angaşt ku êdî êrişî dewletên cîran nakin jî di 24 seatên dawî de êrişan berdewam kir.
Êriş ber bi hedefên pîşesazî ve fireh dibin
Hêzên hewayî yên Îsraîlê li rojava û navenda Îranê êrîşên berfireh pêk anîn. Di nav van êrîşan de depoyên petrolê li Tehranê, navendên çêkirina moşekên balistîk, baregehên IRGCê û navendên leşkerî bûn hedef. Di êrişên hewayî de yekem car tora enerjiyê, rafînerî û depoyên petrolê hetef hatin girtin.
Şewat û dûman bi ser Tehranê ket
Îsraîl û DYAyê di êrişên duh de li gel hedefên leşkerî û îstîxbarî, giranî dan tora enerjiyê ya Îranê. Li du herêmên Tehranê depoyên mezin ên petrolê û neftê bûn hedef. Wêneyên li ser torên civakî belav bûn nîşan didin ku piştî bimbebaranê, benzîn û madeyên petrolê ji depoyan herikîn. Li hind kolan û kuçeyên taxan agir bi petrola li kolanan ket û şewatên mezin derketin.
Îsraîl: Tesîs ji bo binesaziya leşkerî dihat bikaranîn
Li gorî daxuyaniya Hêzên Parastina Îsraîlê (IDF), Hikûmeta Îranê tesîsên hedef hatine girtin ji bo hiştgiriya binesaziya leşkerî bikar dianî.
Qirêjkirina hewa û xetera jîngehî
Rêveberiya Jîngehê ya Îranê bi daxuyaniyekê ragihand ku piştî êrîşên dawî yên DYA û Îsraîlê li ser depoyên petrolê, hejmarek mezin a madeyên qirêj tev li hewa bûne. Li gorî daxuyaniyê, şert û mercên hewayî derketiye asta xeteriyê. Saziyê ji welatiyan xwest ku heta ku pêwîst nebe dernekevin û mimkûn be li malan bimînin.
Heyva Sor hişyar kir: Ger baran bibare xeterî dê mezin be
Heyva Sor a Îranê jî bi daxuyaniyekê hişyar kir ku teqîn û agirên depoyên petrolê madeyên jehrî yên hidrokarbonan, oksîdên sulfur û azotê belav kirine. Li gorî daxuyaniyê, ger baran bibare dê gelek bi asîdî û xeter be. Saziyê ragihand ku baran dikare şewatên kîmyewî li ser çermê mirovan çêbike û zirarên giran bide mirovan.
Li navendên moşekan û tesîsên leşkerî dan
Li gorî agahiyên leşkerî yên Îsraîlê, di êrîşên dawî de du navendên sereke yên çêkirina moşekên balîstîk li Parçîn û Şahrûdê hede fhatin girtin. ÎDFê raihand ku li van her du tesîsan fabriqeyên çêkirina madeyên teqînî, kompleksên madeyên raw ji bo motorên moşekan çêdikin, tesîsên montekirin û avêtina motorên moşekan û navendên ku ji bo lêkolîn û çêkirina moşekan têne bikaranîn hebûne.
‘Di rojekê de 400 hedef hatin tunekirin’
Hêzên Hewayî yên Îsraîlê ragihandin ku di 24 saetên dawî de li rojava û navenda Îranê zêdetirî 400 hedefên leşkerî hedef girtine. Di daxuyaniyê de hate ragihandin ku rampayên moşekên balîstîk, pergalên parastina hewayî, depoyên çekan û navendên fermandariyê yên leşkerî hebûne.
Navendên polîs li Îsfahanê hatin bombekirin
ÎDFê daxuyand ku li Îsfahanê navendek fermandariyê ya polîsên rejîma Îranê têkbiriye û baregehek yekîtiya polîsên taybet jî hatiye tunekirin. Li gorî agahiyan, ev hêz berê di kuştina çalakgeran de xwedî rolek mezin bûye.
Li bajarê Farsê teqînên mezin
Li herêma Darabê ya Parêzgeha Farsê jî binkeyek bin erdî ya moşekan bû hedefa balefirên şer ên Îsraîl û DYAyê. Wêneyên piştî êrîşê nîşan didin ku tesîs bi giranî zirar dîtiye.
HRANA: 33 sivîlan jiyana xwe ji dest da
Li gorî daneyên ku ji aliyê Ajansa Aktîvîstên Mafê Mirovan (HRANA) ve hatine belavkirin, di roja 8emîn a şerê Îsraîl–DYA û Îranê de li 30 parêzgehên Îranê teqîn tespît kirine. Di daxuyaniya rêxistinê de hate diyarkirin ku di 24 saetên dawî de di 133 bûyeran de 485 êrîş hatine qeydkirin. Heman çavkaniyê ragihand ku herî kêm 33 sivîl hatine kuştin û 8 kes jî birîndar bûne.
Ji PENê hişyariya girtîgehan
Rêxistinên PENa Amerîca û PEN Sydneyê bi daxuyaniyek hevbeş balkişandin ser rewşa ewlehiya nivîskar, rojnamevan, lêkolîner û girtiyên siyasî yên li Îranê û banga hişyariyê kirin.
Li gorî daxuyaniyê, xwe gihandina girtiyan a bi xwarin û dermenan sînordar bûye, gelek karmendan cihên xwe terikandine û li şûna wan hêzên ewlehiyê yên taybet hatine bi cih kirin.
Îran: Em serî natewînin
Serokkomarê Îranê Mesud Pezeşkîyan ragihand ku Îran li ber zextên DYA û Îsraîl serî natewîne. Pezeşkiyan got ku Îran dê li dijî êrîşan bersiv dide.
Netanyahû: Em rûyê Rojhilata Navîn diguherînin
Serokwezîrê Îranê Binyamîn Netanyahû jî bang li gelê Îranê kir ku serî hildin. Netanyahû daxuyand ku naxwazin Îranê perçe bikin lê dixwazin gelên Îranê rizgar bikin. Ji bo vê jî Netanyahû ji gelên Îranê xwest ku li dijî rejîmê serî rakin.
Îranê rêber hilbijart lê aşkera nekir
Nûnerê Weliyê Feqî yê li parêzgeha Xorasana Rezewî Ehmed Elemeulhuda destnîşan kir ku wan hilbijartin bi dawî kirine û ji bo Îranê rêberê olî hatiye hilbijartin. Ehmed Elemeulhuda got ku rêber hatiye hilbijartin û endamên Meclîsa Pisporan jî hew dikare vê biryarê biguhêrîne. Hêjayê gotinê ye ku li gor vê daxuyaniyê rêberê olî yê Îranê hatiye diyarkirin û tu destûr û erk hew dikare vê biryarê biguhêrîne. Lê li gel vê jî navê diyarkirî eşkere nekirine. Ji ber vê encamê gelek derdor demildest eşkere kirin ku Îran ji ber fikara dê ji aliyê Îsraîl û Amerîkayê ve bê kuştin newêre navê rêberê xwe yê olî eşkere bike.
Îsraîlê: Rêberê nû nehilbijêrin
Berdevekê Beşa Erebî yê Hêzên Parastinê ya Îsraîlê (IDF) Avichay Adraee li ser hesabên fermî yên dijîtal peyamek weşand. Di peyamê de wiha hate gotin: “Piştî ji holêrakirina Xamaneyê zalim, rejîma terorîst a Îranê niha hewil dide xwe ji nûve bi rêxistin bike û serokek nû hilbijêr e. Encûmena Pisporan a Îranê ku ev 40 sale kom nebûye, tê payîn di demek nêz de li bajarê Komê kom bibe.” Adraee diyar kir ku destên Îsraîlê yên dirêj, Xelîfeyê nû û hemû kesên hewil didin wî hilbijêrîn dişopîne û dê ji holê rake. Anraee bi gotina, “Em hemû kesên difikirin tev li civîna hilbijartina xelîfeyê nû bibin, hişyar dikin: Hûn jî dê bibin hedefa me” hişyariya xwe dubare kir.
