Ligel Peymana 29ê Çileyê jî dorpêçla li ser Kobaniyê berdewam dike û pirsgirêkên jiyanî kûr dibin. Di hevdîtinan bi Şamê re tên kirin de rayedarên Hikumeta Demkî wekî sedem Tirkiyê nîşan didin. Şêniyên bajar û koçber destnîşan dikin ku tu dorpêç û êriş li hemberî îradeya gel nikarin serbikevin.
Dorpêça li ser Kobaniyê di roja 23yemîn de jî berdewam dike. Ligel Peymana 29ê Çileyê û hevdîtinên di navbera aliyan de jî Komên Hikumeta Demkî ya Sûriyê destûr nadin ku alîkarî derbasî bajar bibe. Di encama dorpêçê de li bajar pirsgirêkên jiyanî kûr dibin. Ji ber dorpêçê derman, şîrên zarokan, madeyên xurekê, sotemenî û pêdiviyên din ên jiyanî gelekî kêm bûne û ev yek bandorek neyînî li ser rewşa bajar dike.
Şam Tirkiyê îşaret dike
Li gorî Peymana 29ê Çileyê diviya heta niha komên girêdayî Şamê xwe ji derdora bajar vekişandana û rewş asayî bibûya. Ji bo rakirina dorpêçê di navbera Rêveberiya Xweser û Hikumeta Demkî de heta niha gelek hevdîtin hatin kirin. Li gorî agahiyên rayedarên Rêvberiya Xweser dayîn rayedarên Şamê di hevdîtinan de soza rakirina dorpêçê didin lê di pratîkê de tiştek naguhere. Hate zanîn ku di hevdîtinan de rayedarên Şamê bi awayek ne fermî sedema ranekirina dorpêçê wekî Tirkiye nîşan dane.
Ceyrana Kobaniyê hate çêkirin
Xeta ceyranê ya Kobaniyê ku di encama êrişên komên çete de yên Şam û Tirkiyê de zirar dîti bûn duh ji hêla yekîneyên pispor ên ceyranê ve hatine restorekirin. Piştî yekîneyên Rêvberiya Xweser xet ji nûve çêkirin ceyrana bajar hat. Piştî demek dirêj cardin ji nûve dayîna ceyranê pirsgirêkên sermayê heta astekê çareser kir.
Bi sed hezaran koçber li bajar in
Li bajarê di bin dorpêçê de bi sed hezaran koçber dimînin. Ji ber ku koçber li 70 noqteyên cuda bi awayek demkî hatine bi cihkirin, hêj gelek pirsgirêkên jiyanî didomin û hindî dem derbas dibe jî pirsgirêk kûr dibin. Zêdebûna nifûsê bi xwe pêwistiyên debar, tenduristî û hewandinê derketine asta jor.
Gel dixwaze vegere malên xwe
Şêniyên Kobanê ku bertek nîşanî dorpêçê didin, balê dikişînin ser armancê dorpêçê. Bi vê boneyê dorpêçê mîna hewildanek têkbirina îradeyê dinirxînin û destnîşan dikin ku dê heta dawiyê li berxwe bidin.
Welatiyên diyar kir ku berxwedan tekane riya parastina destkeftiyan e û li dijî hemû êriş û dorpêçan jî dê li berxwe bidin.
