Li paytexta Kolombiyayê Bogotayê komek çalakvanên ji Abya Yala ji bo azadiya fizîkî ya Rêberê Gelê Kurd Abdullah Ocalan çalakî li dar xistin.
Bi wesîleya 2yemîn salvegera pêngava “Ji Rêber Apo re azadî, ji pirsgirêka Kurd re çareseriya siyasî” li bajarê Bogotayê komek çalakvanên ji Abya Yala çalakiyên agahdarkirinê û hevgirtinê lidar xistin. 27 sal di ser komploya navneteweyî ya li dijî Rêberê Gelê Kurd Abdullah Ocalan re derbas bûn. Hêzên navneteweyî 27 sal berê li dijî Rêberê Gelê Kurd Abdullah Ocalan komplo pêk anîbûn. Ev komploya ku 26 dewlet tê de cih girtin, wekî yek ji komploya siyasî yên herî berfireh di dîrokê de cih girt. Tevî şert û mercên tecrîda girankirî Rêber Apo 27 sal in li Îmraliyê têkoşîna xwe berdewam dike û bi berxwedana xwe hêviya azadiyê dide gelên cîhanê.
Bi wesîleya salvegera Pêngava Azadiyê ya Navneteweyî ku bi pêşengiya dostên gelê Kurd di 10ê Cotmeha 2023yan de bi dirûşmeya ‘Ji Rêber Apo re azadî, ji pirsgirêka Kurd re çareseriya siyasî’ gelê Abya Yala yên ku ji vê berxwedanê bandor bûne peyamên xwe yên hevgirtinê didomînin.
Li ser vê bingehê li paytexta Kolombiyayê Bogotayê komek çalakvanên ji Abya Yala, ku ji paradîgmaya Modernîteya Demokratîk îlham digirin, çalakiyek agahdarkirinê lidar xistin û daxwaza azadiya fîzîkî ya Rêberê Gelê Kurd Abdullah Ocalan kirin. Çalakiya ku li kolanên navendî yên bajêr hate lidar xistin, di tevahiya rojê de agahî li ser têkoşîna gelê Kurd û ramanên Rêber Apo hatin danîn. Di çalakiyê de muzîkên Kurdî hatin vekirin û pirtûkên Rêberê Gelê Kurd Abdullah Ocalan hatin nasandin. Nêzîkî 400 broşûrên agahdariyê li gel hatin belavkirin. Çalakvanan pirsên wekî “Kurd kî ne?”, “Rêber Apo kî ye?”, û “Perspektîfên wî yên felsefî û siyasî çi ne?” bersivandin.
Çalakî êvarê bi gerandina govendê li ber muzîka Kurdî bi dawî bû. Kolanên Bogotayê tevahiya rojê bi coşa muzîka Kurdî deng veda.
