Botan TUHAD-DER û TUHAY-DERa Wanê di çarçoveya 25ê Mijdarê de bal kişandin ser rewşa girtiyên jin û diyar kirin ku girtiyên jin bi binpêkirinên mafan re rû bi rû ne û hat xwestin girtiyên jin demildest werin berdan.
Bi pêşengtiya Botan TUHAD-DERê ji bo girtiyên nexweş û girtiyên jin di çarçoveya 25ê Mijdarê Roja Tekoşîna Li Dijî Tundiya Li Ser Jinan daxuyanî hat dayîn. Daxuyanî li ber avahiya Edliyeya Şirnexê bi tevilbûna Berdevka DEM Partiyê Ayşegul Dogan, endam û rêveberên partiyên siyasî û saziyên civaka sivîl pêk hat. Di daxuyaniyê de pankarta, “Bila girtiyên nexweş demildest werin berdan” hat vekirin. Aktîvîsta Tevgera Jinên Azad (TJA) Çîmen Fîdan daxuyanî xwend.
Çîman Fîdan diyar kir ew daxuyaniyê di çarçoveya 25ê Mijdarê de didin û got: “Ev daxuyanî ji bo mezinkirina alîkarî û bîranîna berxwedana birûmet a ku jin li her qadê didine ye. Pêkûtiya li hember jinê sînoran nas nake; dîwarên malan, kolanan, kargehan derbas dike û digihêje heta dîwarên zindanan. Bi taybetî jinên kurd ên dîlgirtî hem ji ber nasnameya polîtîk, hem jî ji ber ku jin in bi îhlalkirinên mafan ên giran re rû bi rû ne.”
Çîmen Fîdan, banga Rêberê Gelê Kurd Abdullah Ocalan a 27ê Sibatê bi bîr xist û wiha got: “Tam jî bi vê sedemê, banga Aştî û Civaka Demokratîk lezgînî û wateya tekoşîna ku jin didin kûr dike. Heta polîtîkayên şer ên ji ber zextan dertên berdewam bike, jin dê hem li girtîgehan, hem lî li kolanan dê bibin hedef. Ev jiyan tenê bi yeksaniyê, edaletê û demokrasiya xwe dispêre Civaka Demokratîk ve pêkan e. Em wekî jin dizanin ku cîhanek bi aştî, azadî û bêtundî pêkan e.Heta ku em vê jiyanê bi Civaka Demokratîk re ava bikin, wê tokoşîna me berdewam be.”
Dogan: Divê girtiyên nexweş werin berdan
Piştî Çîmen Fîdan, Berdevka DEM Partiyê Ayşegul Dogan jî axivî û destnîşan kir ku ji bo girtiyên nexweş werin berdan divê demildest gav werin avêtin û wiha got: “Ji bo girtiyên nexweş werin berdan hewceyî bi vê pêvajoya em têde ne nake. Divê dewlet bêyî ku li pêvajoyê binere girtiyên nexweş demildest berde. Ev pêvajo bi çi awayî bi encam bibe jî divê girtiyên nexweş werin berdan.”
Daxuyanî bi berzkirina dirûşma “Bijî berxwedana zindanan” bi dawî bû.
Wan
Federasyona Komaleyên Hiqûq û Piştevaniyê ya Malbatên Girtî û Hukumxwaran a Medê (MED TUHAD-FED) û Şaxa Komeleya Hevgirtinê ya bi Malbatên Girtî û Hikûmxwaran re (TUHAY-DER) a Wanê, bi boneya 25ê Mijdarê Roja Tekoşîna Li Dijî Tundiya Li Ser Jinan li Kolana Hunerê ya Wanê daxuyaniyek dan. Di daxuyaniyê de pankarta “Azadiya jinan avakirina civakeke demokratîk e” hat vekirin. Rêveberên partiyên siyasî, Dayikên Aştiyê, saziyên demokratîk û gelek welatî tev li daxuyaniyê bûn.
Hevseroka TUHAY-DERê Rengîn Karadûman metna daxuyaniyê ya ku tenê bi zimanê Tirkî bû xwend û bal kişand ser têkoşîna jinan a li dijî pergala serdestiya mêran û desthilata mêrperest.
Daxuyanî bi berzkirin dirûşmeya “Jin jiyan azadî” bi dawî bû.
