Sazî û dezgehên ziman û Şaredariya Bajarê Mezin a Amedê û Şaredariya Sûrê bi minasebeta 21ê Sibatê serdana dikandarên Sûrê kirin û etîket, kokart, belavok û tabelayên Kurdî belav kirin.
Saziyên zimanê Kurdî, Şaredariya Bajarê Mezin a Amedê û Şaredariya Navçeya Sûrê bi minasebeta 21ê Sibatê Roja Zimanê Dayikê ya Cîhanê li Cadeya Gazî ya navçeya Sûrê serdana dikandaran kirin û etîket, kokart, belavok û tabelayên bi Kurmancî û Kirmanckî li belav kirin.
‘Em ê behsa hişmendiya ziman bikin’
Xebatkarên şaredariyan, siyasetmedar û gelek welatî tev li çalakiyê bûn. Beriya çalakî dest pê bike, Hevşaredarê Sûrê Adnan Orhan li Deriyê Çiyê daxuyanî da û bal kişand ser armanca 21ê Sibatê. Adnan Orhan diyar kir ku ew bi minasebeta 21ê Sibatê li Sûrê digerin û serdana gelê xwe û dikandaran dikin. Adnan Orhan anî ziman ku demek dirêj e ji ber ku gelê Kurd bi zimanê xwe diaxive û çalakiyan li dar dixe, zextên giran li ser gelê Kurd e. Adnan Orhan da zanîn ku ew dixwazin zimanê Kurdî li her cihî bicih bibe û şîn bibe û got ku ew ê serdana dikandaran û gel bikin û behsa hişmendiya ziman bikin.
Tabelayên bi Kurmancî û Kirmanckî li dikandaran belav kirin
Piştî daxuyaniyê çalakî dest pê kir. Hevşaredarê Sûrê Adnan Orhan û şandeya pê re serdana dikandaran kirin. Her wiha komek ciwan li erbaneyan dan û strîn. Dirûşmên li ser zimanê Kurdî hatin berzrkiin. Di serdanê de behsa girîng û wateya 21ê Sibatê hat kirin. Tabelayên biçûk ên bi zaravayên Kurmancî û Kirmanckî yên nivîsên “Vekirî, Girtî – Akerde, Girewte” û “Hûn bi xêr hatin – Şima bixeyr amey” li serê bûn li dikandaran belav kirin. Dikandaran tabelayan bi deriyên xwe ve daliqandin.
Zimanzan Zana Farqînî, Seroka Daîreya Xebatên Çandê ya Şaredariya Bajarê Mezin a Amedê Zeynep Yaş û welatî ji ajansa me re axivîn û têkildarî girîngî û wateya 21ê Sibatê ji ajansa me re axivîn.
