Li Amedê bi wesîleya Cejna Remezanê bi pêşengtiya MEBYA-DERê malbat çûn serdana gorên cangoriyên xwe û goristanan paqij kirin.
Bi pêşengiya Komeleya Yekitî Çand Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER) bi wesîleya Cejna Remezanê serdana goristanên ango “Şehîdgeh” ên li gundê Çemê Elîkan û Goristana Gundê Sîsê yên li navçeya Licê û Goristana Pîrejman a li navçeya Pîranê” kirin. Dayikên ku serdana gorên zarokên xwe kirin, goristanan paqij kirin. Li ser goran dua û fatîha hatin xwendin. Malbatan bi wesîleya cejnê şekirên eydê belav kirin.
‘Li ser şopa lehengan…’
Li Goristana Sîsê piştî paqijkirina goristanê Hevserokê MEBYA-DERê Mehmet Emîn Kiliç axivî. Mehmet Emîn Kiliç bîr xist ku ew ê her tim li ser şopa lehengên xwe bin û wiha got: “Di dîroka gelan de gelek lehengî, egîdî hene. Ev lehengî û egîdî ji bo parastina mafên gelê Kurd in. Niha em li goristanan ji bo cangoriyên gelê Kurd li vir in. Wan canê xwe fedayî welatê xwe kir. Em hemû şêhidan bi bîr tînin, bejna xwe li ber têkoşîna wan ditewînin. Bila ruhê we şad bibe.”
Piştî axaftinê deqeyêk rez girtinê serdan dawî bû.
Li her du goristanên din jî malbatan serdana gorên zarokên xwe kirin, dua kirin û goristan paqij kirin.
Goristan hatine rûxandin
Her wiha li aliyê din ev her sê goristan jî ji aliyê leşkerên Tirk ve salên berê hatibûn hilweşandin û kêlikên goran hatine şikandin. Kêlikên hatine şikandin û xerakirin hemû li derdora gorê ne û ev yek jî rêzgirtina dewleta Tirk a li hemberî cenazeyan nîşan dide.
