Ji koçberên bi boneya Hikûmeta Demkî ya Sûriyê koçber bûyî 16 malbat gihaştin gundewarên Çilaxa. Komîteyên xwecih malbatên koçber li malan bi cih kirin û şênî jî pêdiviyên wan dabîn dikin.
Rêveberiya Xweser bi hemû derfetên xwe xizmeta malbatên koçber dike. 16 malbatên ji Efrîn û Şehbayê yên li Reqa, Tebqayê û Humsê diman, ji ber sûc û binpêkirinên komên Hikumeta Demkî koçber bûne, gihaştin herêma Alyan a Çilaxayê. Meclisa bajarokê Kêşikê yê Çilaxayê malbatên koçber ku ji 68 kesî pêk dihatin, pêşwazî kirin û ew li gundên Qesteban, Badyan û Dêrna Axayê bi cih kirin.
Gundî alîkariya malbatan dikin
Malbatên koçber li malên vala yên gundiyan hatin bicihkirin ku ji aliyê şêniyan û meclisa bajar ve hatibûn hazirkirin. Der barê mijarê de endama Meclisa Bajarokê Kêşikê Mehabad Abdullah diyar kir ku wan bi tevkariya komîteyên xizmetguzarî û awarte xanî ji koçberan re amade kirin û got malbat li 4 gundan hatin bicihkirin û lîsteya navên wan hat amadekirin ku alîkarî li wan bê belavkirin.
Mehabad Abdullah destnîşan kir ku gundî alîkariya madî û manewî didin koçberan û pêdiviyên wan dabîn dikin. Her wiha anî ziman ku dê alîkariya bi malbatên koçber re bidomînin.
