Hevserokê Koma Çep a PE’yê Martîn Schirdewan xwest ku astengiyên li pêşiya Rêber Apo werin rakirin û wiha got, “Ez dixwazim biçim Tirkiyeyê û serdana Abdullah Ocalan bikim.”
Forûma Azadî û Aştiyê ya Ewropayê (EFFP) bi daxwaza rakirina astengiyên li pêşiya Rêber Apo ku vîzyona xwe ya siberojê bi cîhanê re parve bike, bi navê “Ez dixwazim biçim serdana Abdullah Ocalan” kampanyayek da destpêkirin. Di nava alîgirên kampanyayê de Koma Çep a Parlamentoya Ewropayê jî cih digre.
Di vê çarçoveyê de daxuyaniya li ser malpera înternetê ya forûmê de bal hat kişandin ser banga Abdullah Ocalan û biryarên di kongreya PKK’ê de hatine girtin.
Hevserokê Koma Çep a PEyê Martîn Schirdewan ragihand ku ew jî dixwaze biçe Îmraliyê.
Schirdewan wiha got, “Abdullah Ocalan ji aliyê dewleta tirk ve 26 sal in di bin tecrîdê de tê girtin. Tevî vê yekê, di Sibata îsal de ragihand ku ger derfetek ji bo pêvajoyek aştiyê ya cidî hebe û ger Serokkomarê Tirkiyeyê Erdogan amade be ku bikeve pêvajoyek aştiyê ya cidî û danûstandinên aştiyê, PKK wê çekên xwe deyne û xwe fesix bike.”
Hevserokê Koma Çep a PEyê wiha domand: “Ji ber vê yekê, ez ji dewleta Tirk daxwaz dikim ku hemû astengiyên li ber raman, vîzyon û pêvajoya aştiyê ya li Tirkiye, Kurdistan û Rojhilata Navîn ku Abdullah Ocalan pêşkêş dike, rake.”
Schirdewan wiha pêde çû: “Ji ber ku ev raman, ev vîzyon û pêvajoya aştiyê wê derfetekê bidin me ku em ji pevçûn û şerê di navbera gelên Kurd û Tirk de derbas bibin. Ez dixwazim biçim Tirkiyeyê û serdana Abdullah Ocalan bikim.”
