Meclîsa Ciwanan a DEM Partiyê êrişa polîsan a li dijî endamê Meclîsa Ciwanan Vedat Ozer şermezar kirin û anîn ziman ku çawa di destpêka têkoşînê de her tim li herî pêş bûn, dê ji niha û şûnde jî her tim li pêş bin.
Polîsan piştî mîtînga di 8ê sibatê de li Amedê pêk hat êrîşî girseyê kiribûn û îşkence li endamê Meclisa Ciwanan Vedat Ozer kirin. Meclîsa Ciwanan a DEM Partiyê têkildarî êrîş û îşkenceya polîsan a li dijî Vedat Ozer daxuyanî da. Ciwanan li pêş nexweşxaneya Zaningeha Diclêyê daxuyanî da. Rêxistinên DEM Partî û DBP yên Amedê, Parlementerê DEM Partiyê yê Amedê Serhat Eren û gelek ciwan tev li daxuyaniyê bûn. Ciwanan di daxuyaniyê de dirûşma “Bijî berxwedana ciwanan” berz kirin. Ewil Parlementerê DEM Partiyê yê Amedê Serhat Eren axivî û êrişa li dijî Vedat Ozer şermezar kir û got: “Gelê me 8ê sibatê li qada îstasyonê ji dewletê daxwaza aştî û azadiyê
kir. Lê mudiriyeta polîsan a Amedê ev çoş û morala gelê me tahamul nekir û piştî mitingê êrişê gel kir. Di encama vê êrişê de hevalê me Vedat Ozer ji ser hişê xwe çû û xwîn rijîya mêjiye wî. Kes nikara daxwaza me ya aştiyê asteng bike.”
‘Desthilat 40 sal in encamê nagire
Pişt re li ser navê Meclîsa Ciwanan a DEM Partiyê Rêzan Kaganarslan diyar kir ku Êrîşa li dijî Vedat Ozer, êrîşa li vîna mîtîngê ye û got: “Gelê me ciwan li qada îstasyonê ji bo aştî û azadiyê dengê xwe bilind kirin. Desthilat dizane aştiyek bi rûmet dê bi destên ciwanan pêk bê. Ji ber vê yekê êrişî ciwanan dikin. Rêberê PKKê Abdullah Ocalan di vê pêvajoyê de ji bo aştiyê hewl dide. Lê desthilat çiqasî bixwazin ve pêvajoyê provake bike, em ciwan soz didin gelên Tirkiyeyê û Kurdistanê. Çawa ku me di destpêka têkoşînê de pêşengî kir û em her tim li herî pêş bûn; emê ji bo aştiyeke bi rûmet jî dîsa li herî pêş bin. Desthilat 40 sal in encamê nagire. Ji niha û şûnde jî dê nikare bigire.”
