Edene – “Meşa çareseriya demokratîk û azadiyê” li Edeneyê bi welatiyan re civiya. Parlamenter Sumeye Boz xîtabî gel kir û destnîşan kir ku muxatabê çareseriyê Abdullah Ocalan e û got: “Divê bawerî bi hêza teorîk û pratîk a birêz Ocalan bê anîn.”
Bi pêşengiya Platforma Saziyên Demokratîk ji Amedê ber bi Enqereyê ve “Meşa çareseriya demokratîk û azadiyê” tê lidarxistin. Meşvanên azadiyê duh li Dîlokê bûn û îro meşvan gihiştin Edeneyê. Şandeya meşvanan ku ji Hevserokak Giştî ya DBPê Çîgdem Kiliçgun Ûçar û siyasetmedar û nûnerên rêxistinên sivîl pêk dihat li taxa Daglioglû ya Edeneyê ji aliyê girseyê ve hat pêşwazîkirin.
Beriya meşvan bigihîjin Edeneyê, welatiyan li ber stranan govend gerand û dirûşm berz kirin. Piştî pêşwaziya şandeyê, meşvan û girse vê carê bi hev re govend gerandin.
Piştî gerandina govendê daxûyanî hat dayîn.
Hevserokê MED TUHAD-FEDê Kerem Canpolat ewilî axivî û spasiya pêşwaziyê kir. Canpolat destnîşan kir ku li Kurdistanê krîzek mezin heye û got: “Li Rojhilata Navîn krîzek mezin heye. Li dijî gelan şer tên meşandin. Jin û zarok tên qetilkirin. Em dixwazin ji vir heta Enqereyê û tevahiya dinyayê em şer naxwazin. Em dixwazin ku çareseriyek çêbibe. Salek û nîv e ji bo çareserkirina pirsgirêka Kurd û ji bo azadiya birêz Abdullah Ocalan kampanya me didome. Li hemû dinyayê û li welatê me berdewam dike.”
Kerem Canpolat bi bîr xist ku di salên 2013-2015an de Rêberê PKKê Abdullah Ocalan wek muxatabek fermî pê re dan û standinê dikir û wiha got: “Aramî û xweşî li welatê me çêbûbû. Em dixwazin ji bo ev aramî çêbibe tecrîd were rakirin û çareserî pêk were. Em dixwazin desthilatdariya AKP-MHPê îradeya gelan binpê neke. Gelê me aştî û çareseriyê dixwaze. Em dixwazin gelê xwe û hemû gelan ji van krîzan biparêzin. Gelê me li her bajarî gotin ku em dixwazin hûn li Enqereyê banga aştiyek mayînde bikin. Em dixwazin dengê aştî û azadiyê li hemû Tirkiyeyê belav bibe.”
‘Divê demildest Ocalan were azadkirin’
Endamê Kongreya Îslamî ya Demokratîk Emîn Ay bal kişand ser armanca meşê ku didomînin û got: “Navê meşa me çareseriya demokratîk û azadiyê ye. Ev meşa me ji bo hemû netewan, baweriyan û çandan e. Ji bo hemû bindestan em dibêjin azadî. Rêberê vî gelî navnîşana çareseriya demokratîk û aştiyê ye. Muxatabê çareseriyê Girava Îmraliyê birêz Abdullah Ocalan e. Rakirina tecrîdê tenê ne bes e. Divê azadiya birêz Ocalan pêk were. Ji bo ku Tirkiye ji van krîzan xelas bibe, divê demildest bi awayek fizîkî birêz Ocalan bigihîje azadiya xwe. Divê şert û mercên ji bo azadiya birêz Ocalan bi lez werin pêkanîn. Divê parlamento bi nûnertiya xwe rabe. Divê demildest vê rewşa heyî û zilma tê kirin ji holê rakin.”
Boz: Navnîşana çareseriyê diyar e
Parlamentera DEM Partiyê ya Mûşê Sumeyye Boz jî axivî û wiha got: “Em ji bo çareseriya demokratîk û ji bo azadiya Ocalan em ji Amedê ber bi Enqereyê ve dimeşin. Fikr û têkoşîna rêzdar Ocalan ji bo hemû gelên Rojhilata Navîn wek nexşerêyekê ye û gelek girîng in. Ji aliyekî ve yên banga aştiyê dikin ji aliyekî ve jî meşa me asteng dikin. Ev yek û dîmena li vir samîmiyeta wan nîşan dide. Em dibêjin ev pêşîlêgirtin rê li ber çareseriyê digire.”
‘Divê bawerî bi hêza Ocalan bê anîn’
Sumeyye Boz destnîşan kir ku çareserî û azadî tenê ne ji bo gelê Kurd hewcedariyek e, ji bo hemû gelên Tirkiyeyê hewce dike û wiha got: “Wan jî navnîşan nîşan da û em jî carek din bang li hemû aliyên Tirkiyeyê dikin ku tenê navnîşanek heye ew jî paradigmaya birêz Ocalan e. Divê bawerî bi hêza teorîk û pratîk a birêz Ocalan bê anîn û demildest azadiya wî pêk were. Heta em bigihîjin armanca xwe û birêz Ocalan bigihîje azadiya xwe û çareserî pêk were, wê têkoşîn û berxwedana me bidome.”
Meşvan piştî hevdîtina li Edeneyê, derbasî Mêrsînê bûn û wê li vir jî daxuyanî bê dayîn û bi nûnerên rêxistinên sivîl re hevdîtin bê kirin.
