Mêrsîn – Beşdarvanên “Meşa çareseriya demokratîk û azadiyê” li Mêrsînê bi xelkê re civiyan. Meşvanan diyar kirin ku ew sibê li Enqereyê ne û dê banga çareseriyê û azadiyê li Meclisê bikin.
Bi pêşengiya Platforma Saziyên Demokratîk ji Amedê ber bi Enqereyê ve “Meşa çareseriya demokratîk û azadiyê” tê lidarxistin. Meşvanên azadiyê piştî Edeneyê, berê xwe dan Mêrsînê. Şandeya meşvanan ku ji Hevseroka Giştî ya DBPê Çîgdem Kiliçgun Ûçar, parlamenterên DEM Partiyê, siyasetmedar û nûnerên rêxstinên sivîl pêk dihat li Parka Aştiyê ya navçeya Akdenîzê bi girseyî di nava coş û peroşê de hatin pêşwazîkirin. Girseyê bênavber dirûşmên weke “Bijî berxwedana Îmraliyê”, “Bijî berxwedana gelê Kurd”, “Gelê Kurd dimeşe azadî dixwaze” û “Bijî berxwedana Rojava” berz kir.
Piştî pêşwaziyê li Parkê daxuyanî hat dayîn.
‘Em ê sibê banga çareseriyê li Meclisê bikin’
Ji Qada Kedê Azîz Ozkan ê di meşê de cih digire ewilî axivî û wiha got: “Me li Amedê meşa xwe da destpêkirin û îro em gihîştin Mêrsînê. Me bi vê meşa xwe piştgirî da bangawaziya rewşenbîran. Em sibê li Enqereyê li ber Meclisê ne. Em ê sibê bang li Meclisê bikin. Em ê banga çareserî û azadiya mayînde bikin. Em wekî kedkaran şer li welatê xwe û li Rojhilata Navîn naxwazin. Em ne şer, em jiyanê diparêzin. Em ne şer em aştî û azadiyê diparêzin. Şer kuştin û tecrîd e. Polîtîkaya tecrîdê ji Îmraliyê dest pê kir û îro hem li hemû girtîgehan û hem jî li derve didome. Em li dijî tecrîdê, çareseriya demokratîk û azadiyê diparêzin.”
Dayika Aştiyê: Êdî dayik şer naxwazin azadiyê dixwazin
Dayika Aştiyê Meryem Tûra ya di meşê de cih digire jî axivî û anî ziman ku ew ji bo gelê Kurd û Rojhilata Navîn aştiyê dixwazin û wiha got: “Dayik şer naxwazin. Bila xwîna tu kesî nerije. Banga me li Serokkomar heye. Bila destekî xwe dirêjî îradeya gelê Kurd û destekî xwe jî dirêjî îradeya gelê Kurd û rojavayê Kurdistanê neke. Em dibêjin destên xwe yên qirêj ji ser îradeya gelê Kurd û rojavayê Kurdistanê rakin. Bila hemû dayik werin em destê aştiyê bilind bikin. Heta ku tecrîd ranebe, yek ji me jî azad nabe. Em azadiya birêz Abdullah Ocalan dixwazin. Em dayik çareseriyê dixwazin. Bila êdî dayik negirîn û hêstirên wan nebar e. Ez bang li Erdogan dikim êdî bes e hûn rê didin ku hêstirên çavên dayikan dibarin. Em dibêjin li vî welatî bila aştiyek mayînde pêk were.”
‘Bi salan e gelê Kurd ji bo azadiyê dimeşe’
Parlamentera DEM Partiyê ya Mêrdînê Salîha Aydenîz jî anî ziman ku gelê Kurd û dostên gelê Kurd bi salan e ji bo azadiyê û demokrasiyê têdikoşin û dimeşin û wiha axivî: “Gelê Kurd û dostên xwe tu carî dest ji berxwedan û meşa xwe bernedan. Wê azadî û demokrasî pêk were. Em bi azadiyê û demokrasiyê bi bawer in. Ev pênc roj in hevalên me ji bo çareseriya demokratîk û azadiyê dimeşin. Em ji vir dibêjin, bila li ber aştiyê û azadiyê barîkatan daneynin. Bila ji bo şer barîkatan deynin. Gelê Kurd ji bo aştiyê dimeşe. Dixwazin li Rojhilata Navîn bê gelê Kurd sînoran xêz bikin û bê wan sînoran ava bikin. Em ê nehêlin ku Lozanek din li Rojhilata Navîn û Kurdistanê pêk were. Heke Lozanek din pêk were wê Rojhilata Navîn wê di nav krîzan de bimîne û xwîn wek golê biherike. Di navenda şerê wan de jî kuştin û tunehesibandina gelê Kurd heye. Heta îro polîtîkaya wan bi ser neket wê ji niha şûn ve jî bi ser nekeve. Ji me re jî jiyanek hevpar û azad mîna rojavayê Kurdistanê lazim e.”
‘Bê birêz Ocalan çareserî li pêş nakeve’
Aydenîz, diyar kir ku ew ji vir bang li desthilatdariyê û muxalefetê dikin û wiha got: “Çareserî bi azadiya gelê Kurd pêkan e. Tevahiya cîhanê ji bo azadiya birêz Abdullah Ocalan û gelê Kurd di nava têkoşînê de ye. Lê belê desthilatdariya heyî şer, kuştin, tunehesibandina Kurdan dixwaze û polîtîkaya xwe dimeşîne. Werin em îro werin li Meclisê ji bo çareserkirina pirsgirêkla Kurd biaxivin. Îro bi milyonan gelê Kurd û dostên xwe îradeya xwe ya çareseriyê birêz Abdullah Ocalan nîşan dide. Her kes baş dizane û dewlet jî baş dizane bê birêz Ocalan çareserî li pêş nakeve. Em ê heta dawiyê û heta çareserî û azadî pêk were dê meşa me bidome.”
Şande piştî daxuyaniyê li oteleke bajêr bi nûnerên rêxistinên sivîl re civiya û li ser armanca meşê axivî û qala pêvajoyê kir.
