Parlementer Newroz Ûysal Aslan di 1emîn Mîhrîcana Govendê ya Jinê de got ku heya azadiyê ew dîlanê bernadin.
Li navçeya Cizîrê ya Şirnexê 1emîn Mîhrîcana Govendê ya Jinê ku ji aliyê Şaredariya Cizîrê û Komeleya Çand Huner û Wêjeyê ya Jinan (KASED) ve hat lidarxistin bi tebilbûna sedan welatiyan li Qada Agirkujiyê bi pêşkêşkirinê lîstîkên govendê û dengbêjiyê bi dawî bû.
Beriya pêşkêşkirina lîstikên govenda 7 herêman Hevşaredara Cizîrê Guler Tûnç axivî û got çand, huner û ziman ji bo Kurdan gelekî girîng e û heya çand, huner û zimanê Kurdî nebe xwedî statû berxwedana wan ê berdewam bike.
Piştre Parlementera DEM Partiyê ya Şirnexê Newroz Ûysal Aslan got ku govend ji bo Kurdan tenê ne lîstikeke û wiha axivî: “Govend ji bo me serhildaneke û heya azadiyê em vê govendê û vê dîlanê bernadin.”
Endama Navenda Çand û Mezopotamya Mekiye Ormanci diyar kir ku ev yekemîn mîhrîcana wan e wiha axivî: “Di vê têkoşînê de gelek hevalên me şehîd ketin. Em vê mîhrîcanê diyarî wan dikin. Hevalên me duh serê vê govendê dikişandin û wê ji îro şûn de jî serê vê govendê bin.”
Piştî axaftinan lîstikên govendê yên 7 herêmên bakurê Kurdistanê hatin pêşkêşkirin. Dema komên govendê lîstîkên herêmên Gimgim, Wan, Riha, Sêrt, Êlih, Amed û Mêrdînê dilîstin welatiyên tevlî mîhrîcanê bûne jî govend gerandin.
Piştî pêşandan govendê mîhrîcan bi stranên dengbêj Xalîde, Hediye Kalkan, Mûkaddes û Lawîn bi dawî bû.
