Saziyên ziman ên Şirnexê û Şerdariya Cizîrê di çerçoveya 15ê Gulanê Cejna Zimanê Kurdî de 11emîn Mîhrîcana Ziman Çand û Hunerê ya Cizîrê li dar xist. Mîhrîcan di roja 3an de bi konsereke bi dawî bû.
Komeleya Ziman û Çandê ya Birca Belek û Komeleya Ziman û Çandê ya Cûdî (CÛDÎ-DER) û Şeredariya Cizîrê di çerçoveya 15ê Gulanê Cejna Zimanê Kurdî de 11emîn Mîhrîcana Ziman Çand û Hunerê ya Cizîrê li dar xist. Mîhrîcan di roja 3yan de li qada Agirkuj a Şeredariya Cizîrê bi konsera Koma Avazên Botan û Koma Sterkên Cûdî ve bi dawî bû. Li ser dikê pankarta “Statuya kurdî perwerdehiya kurdî, Cejna Zimanê Kurdî pîroz be” hat daliqandin. Hevşeredarên Cizîrê Guler Yarbasan Tunç, Abdurrahim Durmuş, endam û nûnerên rêxistinên sivîl û gelek welatiyên Cizîrê tevlî konserê bûn. Beriya konserê welatiyan bi coşeke govend gerandin.
Peyama Abdullah Ocalan hat xwendin
Di destpêke de Hevserokê DEM Partî yê Cizîrê Yilmaz Sanri li ser dikê peyama Rêberê Gelê Kurd Abdullah Ocalan xwend û bi lêv kir ku divê ciwan jî li gor peyama Abdullah Ocalan li her derê xwe rêxistin bikin û got: “Mîhrîcaneke din em ê bi birêz Abdullah Öcalan re pîroz bikin.”
Di konserê de ewilî Koma Sterkên Cûdî li ser dikê stran gotin û gel coşandin. Piştre jî rêveberê Komeleya Ziman û Çandê ya Birca Belek Nuh Rojger An axivî bi lêv kir ku ew di pêvajoya ku bi banga Rêberê Gelê Kurd Abdullah Ocalan pêş xistiyê de Cejna Zimanê Kurdî pêşwazî dikin û got ku divê zimanê kurdî bibe zimanê perwerdehiya fermî. Hevserokên Komeleya Ziman û Çandê ya Birca Belek Edîp Orûç û Berîvan Edîn jî li ser dikê welatî silav kirin û Cejna Zimanê Kurdî pîroz kirin.
Piştre jî Koma Awazên Botan derket li ser dikê, dengbêjî û stran gotin. Konsera fînalê bi gerandina govendê bi dawî bû.
