Parlamentera DEM Partiyê Newroz Uysal Aslan bi boneya 21ê Sibatê Roja Zimanê Dayikê yê Cîhanê li meclisê bi Kurdî daxuyanî da û daxwaza perwerdehiya fermî ya zimanê dayikê û statuya Kurdî kir.
Parlamentera Partiya Wekhevî û Demokrasiyê ya Gelan (DEM Partî) a Şirnexê Newroz Uysal Aslan bi boneya 21ê Sibatê Roja Zimanê Dayikê yê Cîhanê li meclisê Tirkiyeyê bi Kurdî daxuyanî da.
Newroz Uysal Aslan bi lêv kir ku ji avabûna komarê û vir ve li dijî zimanan polîtîkayên pişaftinê, zext û tundiyê tê meşandin û wiha got: “Polîtîkayên pişaftinê bi nenaskirina mafê zimanê dayikê di dibistanan de heta zanîngehan didome. Em gelê Kurd ne ji bo daxwazeke ku ji ber pêvajoya Aştî û Civaka Demokratîk ji bo mafekî xwezayiyê em mafê perwerdehiya bi zimanê dayikê dixwazin. Li ser vê gelek daxwazên me jî çêbûn. Bi boneya Roja Zimanê Dayikê yê Cîhanê em careke din bi bîr dixînin; li Kurdistanê sedî 90î zêdetir zarok tevî zimanê wan Kurdî ye jî bi Tirkî perwerdehiyê dibinin. Em dixwazin astengiyên li pêşiya perwerdehiya zimanê Kurdî rabin, bi Kurdî perwerdehî bê dayîn û pêşiya zimanê Kurdî bê vekirin.”
Newroz Uysal Aslan li dijî polîtîkayên pişaftinê yên li ser zimanê dayikê daxwazên xwe wiha anî ziman: “*Pêwîste astengiyên li pêşiya zimanê Kurdî rabin û zimanê Kurdî bibe xwedî statu.
*Ji pêşdibistanan heta zanîngehê zimanê Kurdî bibe zimanê perwerdehiya fermî.
*Navê gund, bajar û cihên dîrokî ku Kurdî bûn û hatin guherandin careke din bibin Kurdî. Ji bo vê astengiyên li pêşiya rêveberiyên xwecihî jî rabin.
*Li dadgeh, nexweşxane, dibistan û hemû qadên jiyanî xizmet bi zimanê Kurdî jî bên kirin û pêşiya wê bê vekirin. Her ziman ji bo wî neteweyî bi qîmet e. Zimanê Kurdî jî rûmeta me ye. Em careke din dibêjin heta zimanê Kurdî azad bibe û bibe xwedî statu têkoşîna me dê li hemû qadan û meclise bidome.”
