Ofîsa Ragihandinê ya Parêzgarê Kerkûkê ragihand ku heta vê kêliyê jî Rêbwar Teha bi fermî Parêzgarê Kerkûkê ye û tu daxwaznameyek ya îstîfayê pêşkeşî Encûmena Parêzgeha Kerkûkê nekiriye.
Piştî ku îro Encûmena Parêzgeha Kerkûkê bi nameyek fermî endamên xwe vexwendiye civînekê ji bo guhertina wezîfeya parêzgar, kêliyek berî niha Ofîsa Ragihandinê ya Parêzgarê Kerkûkê li ser mijarê daxuyaniyek weşand.
Di daxuyaniyê de hate ragihand ku gotegot û nûçeyên li ser guhertina wezîfeya Parêzgarê Kerkûkê, heta niha, Rêbwar Teha bi fermî Parêzgarê Kerkûkê ye û erkên xwe yên yasayî û îdarî pêk tîne.
Her wiha di daxuyaniya Ofîsa Ragihandinê ya Parêzgarê Kerkûkê de ev tişt hate gotin; “Rêbwar Teha pabendbûna xwe ya ji bo cîbicîkirina her biryara ku ji aliyê serkirdayetiya YNKê ve ji bo guhertina vê postê hatiye dayîn, nîşan daye. Lêbelê, wî tu nameyek îstifayê pêşkêşî Encûmena Parêzgeha Kerkûkê nekiriye.”
