Çalakiya nobetê ya li ser sînorê Pirsûs-Kobanê li dijî êrişan hatiye destpêkirin 3 rojin didome. Aktîvista TJAyê Adle Fidan anî ziman ku ewlehiya Rojava ewlehiya hemû gelan e û xwest her kes ji bo parastina ewlehiyê bibin yek.
Çalakiya nobetê ya li dijî êrişên dewleta tirk û koma wê ya paramîlîter ên li ser Bakur û Rojhilatê Sûriyeyê li ser sînorê Pirsûs a Rihayê û Kobanê hatiye destpêkirin, di roja 3yan de didome. Çalakiya ku di 23ê Kanûnê de di pêşengtiya DBP, DEM Partî û TJAyê de hat destpêkirin 3 roj in didome. Parlamenter, hevşaredar û gelek welatî tev li çalakiya îro bûn. Îro rêxistina DEM Partiyê ya Bismila Amedê û Semsûrê hatin ser sînor û piştgirî dan çalakiyê.
Girse, li ser rêya di navbera Pirsûs û Kobanê de kom bûn û daxuyanî dan.
Em ji bo parastina Rojava bibin yek
Ewil Aktîvîsta TJAyê Adle Fidan axivî û wiha got: “Ewlehiya Rojava ewlehiya me ye. Ewlehiya siberoja Rojava, zarok û jinên Rojava ewlehiya me tevan e. Ji ber vê yekê divê tu kes pêşiya me negire. Çend roj berê du hevalên me yên Rojnamevan hatin kuştin. Em li vir Nazim û Cîhan bi rêzdarî bibîr tînin. Bi qetilkirina rojnamegeran heqîqet û rastiya li Rojava tê veşardin û komkujiya sivîlan vedişêrin, Heqiqetê binpê dikin. Me di 2014an de ev hov baş nas kirin. Em wê rojê jî li dijî van êrîşên hovane rawestiyan, em ê îro jî sekna xwe ya li dijî van êrîşan berdewam bikin. Kesên îro êrîşî Rojava dikin, dixwazin destkeftiyên gelan ji destê wan bigirin. Bila her kes baş zanibin ku di şerê 3emîn ê cîhanê de tu hêz nikare kurdan li Rojhilata Navîn bêstatu bihêle. Em ê bi her awayî li dijî şerê qirêj û vê hovîtiyê rawestin. Em ê her dem berxwedana xwe berdewam bikin. Em jin û hemû gelê kurd êdî jiyanek bê Rêberê Azad û bê statu qebûl nakin. Rojava berî her tiştî nirxê hebûna jinê ye. Em ê heta dawî li vî nirxên jinê xwedî derkevin. Em li vir bang li hemû saziyan dikin ku li vî nîrxî xwedî derkevin. Em li vir ji bo parastina nirxên xwe xwe bikin yek û têkoşîna xwe berdewam bikin.”
Ji bo piştevaniya gelê Rojava em li vir in
Hevserokê DEM Partiyê yê Semsûrê Huseyîn Coşkun axivî û wiha got: “Geşedanên ku li Sûrî û Bakur û Rojhilatê Sûriyê pêş dikevin di serî de hemû kesên aştî, wekhevî û demokrasiyê dixwaze dixe nava fikaran. Em dizanin di bingeha van êrîşan de destkeftiyên Kurdan hene. Em wekî gelê Semsûrê li vir slavên xwe ji gelê Rojava re dişînin. Em wekî rêxistina DEM Partiyê ya Semsûrê ji bo em piştevaniya xwe bi gelê Rojava re parve bikin em hatin nobeta sînorê Pirsûs û Kobanê. Em têkoşîna wan a mezin silav dikin.”
