Çalakiya nobeta xwedîderketina Rojava ya li ser sînorê Nisêbînê û Qamişlo tevî sermayê jî di roja 15emîn de berdewam kir. Carek din berxwedana li Rojava hat silavkirin.
Li ser sînorê Nisêbînê û Qamişlo nobet û çalakiya xwedîederketina li Rojava tevî serma û şiliyê jî di roja 15emîn de berdewam dike. Îro jî rêveberên DBPê û DEM Partiyê yên Nisêbînê, Mêrdînê û navçeyên din, Dayikên Aştiyê, aktîvîstên TJAyê beşdarî çalakiyê bûn. Di çalakiyê de dowîz û pankart hatin vekirin û her wiha wêneyên rojnamevan Cîhan Bîlgîn û Nazim Daştan hatin hildan û dirûşmên dilsoziya bi Rojava re hatin berzkirin.
‘Em berxwedana Rojava silav dikin’
Di çalakiyê de ewilî Dayika Aştiyê dayika Helîm axivî û wiha got: “Bi xêrhatina her kesî kir. Ji vî şerê qirêj re bes e. Rojava nehatiye Tirkiyeyê û pê li axa kesî nekiriye. Dawa maf û axa xwe dikin. Sed silav ji xelkê me yê Rojava re. Bila dest ji van hovan û çeteyan berdin. Êdî ji van êrişan û şerî re bes e. Em êrişên li ser Rojava şermezar dikin. Ji vê xwînê û kuştina ciwanên me têr nebûn? Êdî bes e. Em carek din berxwedana Rojava silav dikin.”
‘Rojava warê Kurdan û welatê me ye’
Hevserokê DEM Partiya Mêrdînê Mehdî Tunç jî axivî û wiha got: “Ev desthilatdarî bi zilma xwe îro biratiya navbera gelan binpê dike. Tenê li ser Rojava şer û pevçûnê diafirîne. Îro li Rojava ji her demê bêtir pêdivî bi jiyanek azad heye. Kurd ji bilî dostanî û hevaltiyê tiştek naxwazin. Kurd dixwazin bi hemû gelan re di nava aştiyê û azadiyê de bijîn. Daxwaza Kurdan daxwaza mafên wan rewa ne. Dixwazin îro dîsa sedsalek din bi Kurdan bidin windakirin. Lê Kurd di dîrokê de ji Şêx Seîd û Seyîd Riza bigire heta îro Kurdan tu carî qebûl nekiriye. Wê tevî hemû zext, êriş û komkujiyan jî Kurd li ber xwe bidin û bigihîjin mafên xwe. Ev welat welatê Kurdan e. Navê vir Kurdistan e. Rojava Kurdistan e. Wê serkeftin a Kurdan be. Wê Kurd bigihîjin armanca xwe ya azadiyê.”
Piştî axaftinan çalakiya îro bi dawî bû.
