Nûnerên partiyên siyasî û hevşaredarên DEM Partiyê yên Amed û navçeyên wê, çûn serdana gora Narîn Guran û ew li ser gora wê ew bibîr anîn.
Nûnerên partiyan û hevşaredaran li ser Narîn Guran a 8 salî ku li taxa Tavşantepe ya navçeya Rezan ya Amedê hate kuştin, li ser gora wê, ew bi merasîmekê bi bîr anîn. Di merasîmê de Hevseroka Rêxistina DEM Partiyê ya Amedê Gulşen Ozer, Hevşaredarên Bajarê Mezin a Amedê û Şaredariyên navçeyan, Parlamenterên DEM Partiyê Bêrîtan Guneş û Adalet Kaya, Hevşaredarên Peyasê Bêrîvan Gulşen Sîncar û Cengîz Dundar, rêxistinên jinan û nûnerên saziyên civaka sivîl amade bûn.
Di merasîmê de li ser kuştina Narîn Guran diyar kirin ku proseya dadweriyê bi bandor nehatiye meşandin û tawanbarên rastîn hêj nehatiye eşkerekirin. Beşdaran daxwaz kirin ku ji bo dabînkirina edaletê gavên biryardar bên avêtin.
Hevşaredarên Peyasê Bêrîvan Gulşen Sîncar û Cengîz Dundar di derbarê mijarê de wiha gotin: “Her tişt wekî eşkere bûye xuya dike lê di rastiyê de tiştek nehatiye eşkerekirin. Ev rewş hestên edalet û ewlehiyê yên gel bi temamî hilweşandiye. Divê ev doza bi hemû zelaliya xwe bê nirxandin, lêkolînkirin û bigihîje qonaxa biryardayîna hiqûqî. Em weke Şaredariya Peyasê careke din diyar dikin ku em li dijî her cure destdirêjî û kuştinên li ser zarok û jinan in û em ê ji bo pêşîgirtina li êrîşên bi vî rengî xebatên xwe yên piştgirî û hevgirtinê xûrt bikin û bidomînin.”
Merasîma bibîranînê bi danîna kulîlkan li ser gora Narîn Guran bi dawî bû.
