Nûnerên gel Serokê HEPê yê Amedê Vedat Aydin ku ji aliyê JîTEM’ê ve hatibû revandin û kuştin, li ser gora wî ew bi bîr anîn.
Nûnerên gel, bi boneya Cejna Qûrbanê goristan ziyaret kirin. Nûneran Serokê Rêxistina Partiya Kedê ya Gel (HEP) yê Amedê Vedat Aydin ku ji aliyê JÎTEM’ê ve di 5ê Tîrmeha 1991an de hat revandin û piştre hat kuştin li ser gora wî ew bibîr anîn. Rêveberên Komeleya Piştgirî, Yekitî û Çandê ya bi Malbatên ku Hezkiriyên Xwe Winda Kirine di Nav Bexçeyê Şaristaniyan (MEBYA-DER), malbata Aydin, Berdevka Meclîsa Jinan a Partiya Wekhevî û Demokrasiyê ya Gelan (DEM Partî) Halîde Turkoglu û hevserokên Partiya Herêman a Demokratîk (DBP) ên bajarê Amedê û hevşaredar û gelek kes beşdarî bîranîna ku li Goristana Deriyê Mêrdînê ya Amedê hate lidarxistin bûn.
Birayê Aydin Veysî Aydin diyar kir ku rojên cejnê pîroz in û got: “Me gelek caran xwest ku cejn bibe wesîle ji bo aştiya bi rûmet. Îro pêvajoyek tê meşandin û em dixwazin ev pêvajo ber bi aştiyê ve biçe. Em bi keda şehîdên xwe hatine van rojan. Têkoşîna wan wê rê li ber me veke.”
Berdevka Meclisa Jinan a DEM Partiyê Halîde Turkoglu jî axivî û diyar kir ku ew bi vê bernameya bîranînê ve di heman demê de hesab dipirsin. Halîde Turkoglû bi bîr xist ku destpêka kuştinên kiryar nediyar kuştina Vedat Aydin e û got: “Ev têkoşîn wê bi aştiyê tacîdar bibe. Em ji bo vê têdikoşin. Ev berdêl wê avakirina civaka demokratîk misoger bikin.”
Bîranîn li ser gora Aydin bi danîna qurnefîlan bi dawî bû.
