Xizmên Windayan û ÎHDê bi daxwaza ‘Bila winda bên dîtin, kujer bên darizandin’ vê hefteyê bal kişandin ser kuştina Vedat Aydin û xwestin kujerên Vedat Aydin bên dîtin û cezakirin. Şukran Aydin anî ziman ku ew şahidê bûyerê ye û kujer diyar in.”
Şaxa Komeleya Mafên Mirovan (ÎHD) a Amedê û xizmên windayan di hefteya 856emîn li pêş Bîrdariya Mafê Jiyanê ya Parka Koşûyolû ya Amedê kom bûn û daxuyanî dan. Malbatan û nûnerên ÎHDê di çalakiyê de wêneyên kesên ji aliyên dewletê ve hatine windakirin hilgirtin. Hevjîna Wedat Aydin Şukran Aydin û birayê wî Veysî Aydin, Hevseroka DEM Partiyê ya Amedê Gulşen Ozer, endamên Komeleya Wêjekarên Kurd, endamên Komeleya 78an, MEBYA-DER, TUAY-DER û gelek saziyê sivîl ên Amedê beşdarî daxuyaniyê bûn. Xizmên windayan û ÎHDê vê hefteyê aqûbeta Serokê Rêxistina HEPê ya Amedê Wedat Aydinê pirsîn.
Ji aliyê dewletê ve hat kuştin
Di çalakiyê Serokê ÎHDê Ercan Yilmaz, anî ziman ji salên 90î heta niha gelek bûyerên bi vî rengî pêk hatin û hê jî li Kurdistanê heman tişt didomin û got: “Ji ber ku Vedat Aydin, li zimanê zikmakî û doza xwe xwedî derketebû ew hat kuştin. Ew entelektuelekî Kurd bû û ji aliyê dewletê ve hat qetilkirin.”
‘Divê lêborînê bixwazin’
Hevjîna Vedat Aydin, Şukran Aydin jî xwest dewlet lêborîn bixwaze û wiha got: “Li gorî me faîl ne meçhûl in faîl diyarin. Pêşî ev bûyerên heyî ji Wedat, destpêkirin. Dema ku hatin wî ji malê birin, baş tê bîra min. Ez şahidê wê wextê me. Vedat got ‘Dê min ji holê rakin.’ Ji ber ew bi kurdî diaxivî û li zimanê zikmakî xwedî derketebû ji wî destpêkirin. Piştî destpêkirin ev hejmarên kuştinê 15 hezar derbas kir. Em pereyan naxwazin. Em dixwazin dewlet lêborînê bixwaze. Niha pêvajoyeke nu hatiye destpêkirin. Dê PKK çekan berde. Ev baş e. Lê dewletê çiqas gav avêtiye. Tenê PKK çekan deyne têr nake. Mafê ew qas mirov divê li ber çavan bê girtin.”
‘Faîl diyar in’
Birayê Vedat Aydin, Veysî Aydin jî anî ziman ku faîlên windayan ne winda ne diyarin û wiha axivî: “Hişmendiya dewletê her tim digot Kurd tune ne. Biryara ku PKKê ji daye biryareke gelek bi nirxe. Kurd mafdar in û ji ber mafê wan nehate naskirin hertim ji aliyê dewletê ve hatine înkarkirin. Îro jî hewceye ku dewlet ji kurdan lêborîn bixwaze û xwe bide efûkirin.”
‘Divê faîl bên darizandin’
Hevseroka Rêxistina DEM Partiyê ya Amedê Gulşen Ozer jî got: “Divê ku faîlên van kujeran bên darizandin û lêborîn ji malbatên kesên ku hatine kuştin bixwazin.”
