Şaxa OHDê ya Amedê têkildarî girtina Şaredarê Bajarê Mezin ê Stenbolê Ekrem Îmamoglu û jidûrxistina wezîfeya rêveberiya Baroya Stenbolê daxuyanî da. Hevserokê Şaxa OHDê ya Amedê Muhîttîn Mûgûç xwest ku desthilatdar vîna gel nas bike.
Şaxa Komelaya Hiqûqnasên Ji Bo Azadiyê (OHD) ya Amedê nerazîbûn nîşanî biryara jidûrxistina Baroya Stenbolê û girtina Şaredarê Bajarê Mezin ê Stenbolê Ekrem Îmamoglu da. Rêveberên OHD li avahiya şaxa xwe kom bûn û daxuyanî dan çapemeniyê. Serokê Baroya Amedê Abdulkadir Gûleç, Hevserokê Şaxa OHDê ya Amedê Muhîttîn Mûgûç, rêveber û endamên OHDê beşdarî daxuyaniyê bûn.
Deshilatdar bi destê dadgehê vîna gel tune dike
Hevserokê Şaxa OHDê ya Amedê Muhîttîn Mûgûç xwend û xwest vîna gel bê naskirin û got: “Baroya Stenbolê bertek nîşanî kuştina rojnemeger Cîhan Bîlhîn û Nazim Daştan da û xwest kuştina wan bê lêpirsînkirin. Ji ber vê daxwaza Baroyê dadgehê Baro kir hedefa xwe û doz li baroyê vekirin. Di 21ê Adarê de rêveberên Baroya Stenbolê ji kar dûr xistin. Di 19ê Adarê jî Şaredarê Bajarê Mezin ê Stenbolê Ekrem Imamoglu hat binçavkirin û 23ê Adarê hat girtin. Dîsa qeyûm tayînî Şaredariya Şîşliyê kirin. Piştî wan bûyeran gel herikî qadan û dest bi çalakiyan kir. Gel bi êrîşê polêsan ve rû bi rû ma. Deshilatdar bi destê dadgehê vîna gel tune dike. Em wekî Komeleyên Hiqûqnasên Ji Bo Azadiyê mafên mirovan tînin bîra desthilatê û em dixwazin desthilat vîna gel nas bike. Em dixwazin biryara der barê Ekrem Îmamoglu û Baroya Stenbolê de paşve vekişîne.”
