Wan- Nûnerên saziyên demokratîk ên li Wanê bertek nîşanê êrişên li ser Rojava dan û gotin: “Parastina Rojava parastina jiyanê ye. Ev hêza me heye ku em vê jiyanê biparêzin û li dijî van êrişan têkoşînek bi heybet bimeşînin.”
Li Suriyeyê 8ê Kanûnê Heyet Tahrîr El Şamê (HTŞ) rejîma Baasê ya 61 salan hilweşand û li Sûriyeyê pêvajoyeke nû dest pêkir. Piştî HTŞê Heleb, Hema, Hims û Şam xist kontrola xwe bi awayekî hemwext koma paramîlîter Arteşa Netewî ya Suriyeyê (SMO) û çeteyên din ên xwe dispêrin Tirkiyeyê li dijî herêmên Rêveberiya Xweser dest bi êrîşan kirin. Komên çeteyan bêtir êrîşên xwe li ser Minbic, Tebqa, Reqa, Tişrîn û Şehbayê zede kirin. Ji ber êrîşan bi deh hezaran Kurdên Efrînê ku li Şehbayê bicih bûbûn koçî Tebqa û Reqayê kirin. Her çend HSDê xwest li Minbicê agirbestê û li herêmên din agirbestê îlan bike jî dîsa êrîşên çeteyan û hêzên girêdayî Tirkiyeyê li ser Bakur û Rojhilatê Sûriyeyê berdewam dike. Niha jî Tirkiyeyê û komên çekdar ên giredayî wê ji bo êrişî Kobanê û Eyn Îsa bike amadekariyên lêşkerî dike. Nûnerên saziyên demokratîk û civakî yên li Wanê li ser êrişên Bakur û Rojhilatê Sûriyeyê ji Ajansa Welat re axivîn.
‘Hêza me heye em vê jiyanê biparêzin’
Endama Komeleya Çand û Hunerê ya Aryenê Hêlîn Demîrtepe diyar kir ku gelê Kurd li Bakur û Rojhilatê Sûriyeyê û Rojavayê li dijî zilm û zordariyê têkoşîneke bi heybet meşandin û ev jiyana azad, hevpar li Rojava tê jiyin ji bo hemû cîhanê model û mînak e. Hêlîn Demîrtepe anî ziman ku armanca êrişên ku bi destên Tirkiyeyê li ser Rojava tên meşandin kuştina jiyana azad û hevpar e û wiha got: “Em dixwazin ew modela ku li Rojavayê tê jiyîn li her aliyên Kurdistanê pêk were. Divê li hember êrişên dagirkeriyê û kujerên li ser Rojava di serî de jin û hemû gelên Kurdistanê qebûl neke û jiyana ku li li Rojavayê tê jiyîn biparêze. Parastina Rojavayê parastina jiyanê ye. Divê gelê Kurd bi hêvî be. Ji ber ku ev jiyana niha li rojava tê jiyîn bi destên me hat avakirin û ew hêza me jî heye em vê jiyanê biparêzin. Divê em li dijî van êrişan têkoşînek bi heybet bimeşînin.”
‘Heke Rojava tune be em jî tune ne’
Endama Komeleya Alîkarî û Piştevaniyê ya bi Malbatên Girtî û Hikumxwaran re ya Wanê (WAN TUHAY-DER) Helîme Albay jî êrişan li ser Rojava şermezar kirin û dest nîşan kir ku Dewleta Tirk êrîşî jiyana demokratîk ku gele Kurd li Rojava bi têkoşînê ava kiriye, dikin û got: “Çawa ku bi pêşengtiya jinan ev têkoşîna dîrokî pêş ket û Kobanê ji destên DAIŞê hat rizkirin, divê gelê Kurd dîsa li çar aliyên Kurdistanê bibin yek û van êrîşan qebûl nekin. Divê jin, ciwan van êrişan qebûl nekin û rabin ser piyan. Heke Rojava tune bibe, em ê jî tune bibin. Em ê dîsa bi têkoşîna xwe bi ser bikevin.”
‘Dixwazin hemû Kurdan tune bikin’
Hevseroka Komeleya Yekitî, Çand, Alîkarî û Piştevaniyê ya bi Malbatên ku Xizmên xwe li Dergûşa Şaristaniyê de Winda Kirine re (MEBYA-DER) ya Wanê Xanê Kaya jî bi bîr xwist ku 12 sal bere xwestin bi destên DAIŞê li Rojava gelê Kurd têk bibin. Lê bi pêşengiya jinan ve çete têk çûn û wiha axivî: “Dewleta Tirk dîsa dixwaze van destkeftiyên jinan, ciwanan û gelan têk bibe. Ev şerê ku niha li ser Rojava pêk tê, tenê ne li ser Rojava ye. Di şexsê Rojava de, dixwazin hemû Kurdan tune bikin. Gelên Erep, Turkmen û Kurd li rojava jiyaneke hevpar û komûnal dijîn û ev model ji hemû cihanê re mînak e. Rojava ji bo gelan û gelê Kurd cihekî giring e. Dewlet jî vê jiyanê naxwaze û bi destên çeteyan êrişê destketiyên gelan û gelê Kurd dike. Divê hemû gel destên xwe bidin hev û wekî rihê Kobanê ku DAIŞ têk bir, van çeteyan jî têk bin. Desthilatdara digotin ‘Kobanê ket ha ket’ Lê Kobanê neket û bi pêşengtiya jinan bi ser ket û bû mînak. Divê em dîsa li çar aliyên Kurdistanê yekîtî û têkoşina xwe hevpar bikin. Divê em bi ruhê Kobanê Rojava biparêzin.”
