Hevseroka Giştî ya DBPê Çîgdem Kiliçgun Uçar li Sêrtê di civîna gel de axivî û destnîşan kir ku di çareseriya pirsgirêka Kurd de gava herî girîng azadiya Rêberê PKKê Abdullah Ocalan e.
Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) di çarçoveya çalakiyên “Aştiya Civakî û Azadiyê” de li bajarên bakurê Kurdistanê û Tirkiyeyê bi gel re civînan li dar dixin. Di vê çarçoveyê de li avahiya Rêxistina DEM Partiyê ya Sêrtê bi tevlibûna Hevseroka Giştî ya DBPê Çîgdem Kiliçgun Uçar bi gel re civîn hat lidarxistin. Gelek kes tev li civînê bûn. Destpêkê Hevserokê DEM Partiyê yê Sêrtê Eşref Tekîn axivî û bal kişand ser hevdîtinên têkildarî pirsgirêka Kurd û ji bo mitînga 8ê Sibatê ya li Amedê bê lidarxistin banga beşdariyê kir.
‘Sed sal in neheqî û zilm li Kurd û gelan tê kirin’
Hevseroka Giştî ya DBPê Çîgdem Kiliçgun Uçar jî di civînê de axivî û ewil bertek nîşanî tayînkirina qeyûmê ser Şaredariya Sêrtê da. Çîgdem Kiliçgun Uçar bal kişand ser nîqaşên têkildarî çareseriya pirsgirêka Kurd û wiha got: “Ev sed sal in gelê Kurd mîna gelên din wekhev najî. Li hemû gelan neheqî hatin kirin. Lê gelê Kurd bi polîtîkayên zilmê re rû bi rû ma û neheqiyek mezin hat kirin. Sedsala Tirkiyeyê kirin qurbaniyê yekperestiya dewletê. Lê tu xêra wê ji bo gelên Tirkiyeyê nebû. Em niha li ber çareseriya demokratîk a pirsgirêka Kurd in ku ev sed sal in tune tê hesibandin. Pêvajoya ku bi silavdayîna Devlet Bahçelî dest pê kir, bi çûna Îmraliyê re derbasî qonaxeke nû bû.”
‘Gava girîng azadiya birêz Ocalan e’
Çîgdem Kiliçgun Uçar destnîşan kir ku Rêberê PKKê Abdullah Ocalan hê jî di girtîgehê de ye û got: “Ji bo serdema nû veguhere pêvajoyekê, gava herî girîng ew e ku birêz Ocalan ji Girtîgeha Îmraliyê derkeve, azad bibe û çareseriya pirsgirêkê bi partî, rêxistin û gelê xwe re nîqaş bike. Çima tenê li bendê ne ku birêz Ocalan gav biavêje? Dewleta ku îdia dike aqilek daniye holê çima gavan naavêje? Li Meclisê israrek heye. Di nîqaşên pêvajoya 2013-2015an de muxalîfên siyasî nehatibûn daxilkirin. Lê niha divê hemû partî beşdarî vê pêvajoyê bên kirin û nexşerêyek hebe. Lê belê li tu cihekî nîqaşeke wiha tune ye. Em qala nîqaşeke ku bi qurbanî tu îktîdaran divê neyê kirin, dikin. Em dikevin sedsaleke nû û ji bo berpirsyartiyan li xwe bigirin hatine gel hev.”
Piştî axaftinan, civîn ji çapemeniyê re girtî berdewam kir.
