Amed – Di salên dawî de gelek polîs bûyeren wek dizî û kuştinê dikin. Herî dawî polîsê bi navê Cumhur Yilmaz ê li Amedê erkdar bû li Ordûyê diziya zêrînger kir û paşê li Amedê hate binçavkirin. Her çiqas polîs wekî “berpirsiyarê ewlehiyê” tên pênasekirin jî di salên dawî de gelek polîs tev li bûyerên diziyê dibin.
Polîsê bi navê Cumhur Yilmaz ê li Amedê erka polîsê tîmên taybet dikir, li navçeya Fatsayê ya Orduyê di 25ê Mijdarê de diziya dikana zêrînger kir û 170 bazin dizî. Polîs Cumhur Yilmaz paşê reviyabû Amedê, li Amedê hat binçavkirin. Polîsên ku bi piranî li navçe û bajarên Bakurê Kurdistanê erkdar in, dikevin nava gelek karûbarên qirêj û sûcên giran dikin.
Li şûna ewlehiyê biparêzin xera dikin
Polîs di ferhengan de wekî “kesên ewlehiyê mîsoger dikin, berpirsiyarê ewlehiya gel in” tên pênasekirin. Lê di geşedan û pêşketinan de tê dîtin ku ne wisa ye. Navê polîsan di nûçeyên “dizî, kuştin û îşkenceyan” de derbas dibe. Tê dîtin ku polîs ji parastina ewlehiyê zêdetir tev li bûyerên li dijî aramî û ewlehiyê dibin.
Polîs maddeyên hişbire difiroşin
Polîsên li Bakurê Kurdistanê erkdar in navê wan di gelek sucên kuştin û îşkencê de derbas dibe. Lê yên herî balkêş firotina madeyên hişbirê, qacaxvaniya tiryakê û fihuşê ne. Di tora tiryak, hişbir û fihûşê de navê polîsan jî derbas dibe. Bi dehan polîs tev li sûcên firotinê tiryak û tecawizê bûne lê lêpirsînek baş pêk nehatiye û polîs ceza nexwarine. Herî dawî polîs Cumhur Yilmaz li navçeya Fatsayê ya Ordûyê dikana zêrînger şêland.
Polîs Cumhur Yilmaz
Bi hezaran polîs di aliyê derûniyê de tedawî dibin
Di gelek bûyeran de tê dîtin ku polîsên sûcan dikin nayên cezakirin. Gelek ji wan wekî “psîkopatan” tevdigerin. Her ku diçe nexweşiya derûnî di nava polîsan de zêde dibe. Di gelek nûçeyan de gotinên “polîs malbata xwe kuşt, polîs hempîşe xwe kuşt, polîs xwe kuşt, polîs dizî kir” derbas dibin. Di sala 2025an de gelek polîsan xwe kuşt. Gelek polîs jî berî ku xwe bikujê malbata xwe jî kuşt.
Polîsê bi navê M.G. li navçeya Kepezê ya Antalyayê hevsera xwe û du zarokên xwe kuştin. Polîs M.G. paşê hatibû binçavkirin.
Polîsê bi navê M.K li Wanê li ser navê hevsera xwe erebeyekî kirê kiribû, li navçeya Hewêlê ya Sêrtê di noktaya polîsan de hatibû sekinandin û di nava erebeyê de 16 kîlo tiryak hatibû girtin.
Di 16ê Hezîranê de li navçeya Fatîha Stenbolê polîsê bi navê Semîh G. hevalê xwe yê malê kuştibû û paşê termê Huseyîn G. parçe parçe kiribû. Semîh G. paşê xwe jî kuştibû.
