Riha – Jinên ku bi Însiyatîfa Pêdiviya Min Bi Aştiyê Heye ya Jinan re ji bajarên Tirkiye û Bakurê Kurdistanê berê xwe dan navçeya Pirsûsê diyar kirin ku êriş li dijî paradîgmaya Rêberê Gelê Kurd Abdullah Ocalan e û heta êriş rawestin dê têkoşîna xwe bidomînin.
Komên çete êrişên qirkirinê li dijî Rojava berdewam dikin. Tevî agirbestê jî êriş li dijî destkeftiyên Rojava êriş pêk tên. Li ser destpêkirina êrişên qirkirinê li dijî Rojava, Rêveberiya Xweser a Rojava seferberiya neteweyî ragihand û li çar aliyên Kurdistanê û cîhanê deng veda û bi milyonan Kurd rabûn ser pêya. Tenê ne Kurd, dostên wan jî li gelek welatan piştgirî dan berxwedana li Rojava. Însiyatîfa Pêdiviya Min Bi Aştiyê Heye ya Jinan ku ji bajarên Tirkiyeyê û Bakurê Kurdistanê ji bo piştgiriya Rojava û Kobanê hatin navçeya Pirsûsê ya Rihayê ji ajansa me re axivîn.
‘Em hatin ku bêjin; têkoşîna jinan sînoran radike’
Rêvebera Komeleya Dema Jinan Newroz Onverdî ku ji Stenbolê hatibû Pirsûsê anî ziman ku mabesta wan a hatina Pirsûsê piştgiriya ji bo Rojava ye û wiha got: “Em hişmendiya HTŞê dizanin. HTŞê jî hişmendiya DAIŞê ye. Em hatin ku bêjin; Têkoşîna jinan sînoran radike. 11 sal berê jî DAIŞê êrişî Rojava kiribû. Wê demê jî însiyatîfa me hatibû vir û di konan de nobed girtibû. Îro jî bi heman sekn û helwestê li vire û nîşan dide. Ji bo hemû jin, netew û baweriyên cuda di nava pergaleke azad û wekhev de bijîn em bi Rojava re di nava piştgiriyê de ne. Ev êrişên hişmendiya mêrsalar in. Ev hişmendî jinan û pergala demokratîk û wekhev a azad hedef digire. Heta êrişên li ser Rojava bi dawî bibe em ê têkoşîna xwe bidomînin. Daxwaza me ew e ku li dijî dorpêça li ser Kobanê deriyê sînorê Murşîtpinar bê vêkirin û alîkarî bigîhîjin welatiyên Kobanê.”
‘Hade kesî nînê Kurdan biqedînin’
Dayika bi navê Halîme Kazici jî bertek nîşanî êrişan da û ev bang li gel kir: “Em li dijî şer in. Em aştiyê dixwazin. Êrişên li ser Rojava bi dawî bikin. Zarok ji sermayê dimirin. Xwarin û av tune ye. Yên piştgiriya wan êrişan dikin çawa dikarin xwarinê bidin zarokên xwe. Em nikarin xwarinê bidin zarokên xwe. Em nikarin rakevin. Zarok tî û birçî ne. Lê em naqedin. Hedê kesî nîn e Kurdan biqedînin. Colanî dibêjê ez ê Kurdan biqedînim lê ne hede wî ye. Em ê her tim hebin û li ser pêyan bin. Banga min jî ji gelê Kurd ew e ku rabin ser pêyan. Bila kes netirse. Bila me bikujin dê çi bibe. Bila em careke bimirin ne deh caran.”
‘Paradigmaya birêz Abdullah Ocalan dikin hedef’
Parêzer Gulşen Demîr jî ku ji Amedê hat Pirsûsê destnîşan kir ku êrişên li Rojava di heman demê de li dijî pergala Netewa Demokratîk a Rêberê Gelê Kurd Abdullah Ocalan in û wiha got: “Ji sala 2014an vir ve li Rojava li ser paradîgmaya Rêberê Gelê Kurd Abdullah Ocalan pergalek hat avakirin. Niha ew êrişên li ser Rojava di heman demê de li dijî paradîgmaya Rêberê Gelê Kurd Abdullah Ocalan e. Li wir azadiya jinan, netew û baweriyên cuda esas tê girtin. Di heman demê de li dijî modernîteya kapîtalîst jî têkoşînek heye. Ji bo wê jî hemû dinya li dijî vê paradîgmayê li ser Rojava êrişên dijwar pêk tînin. Di êrişên de cihên xwarin û nexweşxanê û pêdiviyên bingehîn ên welatiyan tên hedefgirtin. Ew yek sûcê şer e. Em jî li dijî vê yekê li Pirsûsê ne. Em bang li hemû jinên dinyayê û saziyên navnenteweyî dikin; li dijî jin û zarokan sûcên mezin tên kirin. Divê hemû kes li dijî vê yekê dengê xwe bilind bike û jinek jî vê yekê qebûl neke. Her wiha ez bang li gelê Kurd jî dikim; yekîtiya me ferz e. Em bi hev re dengê xwe bilind bikin.”
Nîlgun Oktay jî li dijî êrişan ji Stenbolê hate Pirsûsê diyar kir ku daxwaza wan ew e ku şer bisekine û got: “Ji bo şer rawste em hatine vir. Em dixwazin ev şer êdî biqede û dayik êdî negirîn. Em dixwazin êdî yekîtiya gelê Kurd jî pêk were û divê em her dem li pişt Rojava bin.”
