Rageşiya di navbera Tayland û Kamboçyayê de ku nêzîk hefteyekê ye bi pevçûnên biçûk didome hindî diçe zêde dibe. Di pevçûnên ji meha Tîrmehê heta niha de ji her du aliyan 48 kesan jiyana xwe ji dest dane û zêdetirî 300 kesî jî birîndar bûne.
Tayland û Kamboçya ku bi boneya serweriya Perava Tratê li hev nakin, cardin bi rageşiyek ber bi şer ve diçe re rû bi rû ne. Pevçûnên di navbera her du welatan de di Tîrmeha 2025an de cardin dest pêkirin û di encamê de ji her du aliyan 48 kes mirin û zêdetirî 300 kesî birîndar bûn. Bi navbeynkariya Serokê Amerîkayê Donald Trump agirbest hate îlankirin û peymaneke demkî hate îmzekirin.
Pevçûn ber bi îhtîmala şer ve diçin
Lê agirbest û peymana Trump zêde dom nekir. Taylandê di meha mijdarê de daxuyand ku li gorî peymana aştiyê ya hatî îmzekirin tevnagere. Rageşiya di navbera her du welatan de di 8ê Kanûnê de cardin vegeriya pevçûnên germ. Her du dewletan êrîşên hêzen hev û xetên lojîstîk û binesaziyê yên li Perava Tratê kirin. Di êrîşan de ji her du aliyan jî windahiyên can û wêrankirina binesaziyê çêbûn.
Arteş derbasî rewşa şer bûn
Fermandariya Parastina Sînor a Taylandê daxuyand ku operasyonek berfireh a bi navê, “Trat Prap Porapak” daye destpêkirin. Her wiha di daxuyaniyê de hate destnîşankirin ku artêşa Taylandê dê di 10ê Kanûnê de li seranserî sînorê Tratê bê bicihkirin. Li gorî nûçeyê keştiya şer a bi navê HTMS Thepa jî dê 24 seatan li herêmê keşfê bike û hêzên hewayî jî dê di asta elermê de ji bo piştgiriyê amade bin.
Trump dê cardin navbeynkariyê bike
Trump di daxuyaniyeke du roj berê dayî de diyar kiribû ku dê bi telefonê li her du dewletan bigere û dawiyê li şer bîne. Di demeke ku her du dewlet amadekariya şerê hev dikin, çav li rê ye Trump bikeve navberê. Li gorî çapemeniya Amerîkayê peymanên Trump ji ber ku ji rastiyê dûr in, bêencam dimînin.
