Rêveberiya Xweser û HSDê bi minasebeta salvegera 10emîn a serekftina berxwedana Kobanê diyar kir ku îradeya azad serkeftinê ava dike. Rêveberiyê bang li hemû hêzên nîştimanî û civata navneteweyî kir ku li dijî êrişên li ser Bendava Tişrînê û gefên li ser destkeftiyên Rojava berpirsyariyên xwe bi cih bînin.
Îro salvegera 10emîn a rizgarkirina bajarê Kobanê ye. Kobanê bi berxwedaniya xwe ya li dijî çeteyên DAIŞê li tevahiya cîhanê tê nasîn. Şervanên gelê Kurd û dostên xwe roja 26ê Çileya 2015an bajarê Kobanê ji çeteyan paqij kirin û rizgariya wê ragihandibûn. Bi minasebeta salvegera rizgakirina Kobanê gelek partî, tevger û rêxistinên Kurd daxuyanî didin.
Rêveberiya Xweseriya Demokratîk a Herêma Bakur û Rojhilatê Sûriyeyê bi wesîleya salvegera 10emîn a serkeftina berxwedana Kobanê daxuyaniyek weşand.
ˈSerkeftina Kobanê serkeftina mirovahiyê bû’
Rêveberiya Xweser di daxuyaniyê de diyar kir ku serkeftina berxwedana Kobanê bû sedema bidawîbûna projeyên tundrew li Sûriye, herêmê û cîhanê.
Rêveberiya Xweser bal kişand ser hevgiritna pêkhateyên gelê herêmê di berxwedana Kobanê de û hate gotin: “Berxwedana ku di encama hevgirtina pêkhateyên gelê me de hate bidestxistin rastiya vîna gel û hêza wê ya li hember projeyên qirkirin û tunekirinê îsbat kir. Serkeftina Kobanê serkeftina mirovahiyê bû. Serkeftina vê berxwednê Sûriye û hemû cîhan ji xeterî û tundrewiyê parast. Berxwedana gelê me li Kobanê û tevlêbûna hemû Kurdistanî û enternasyonalîstan ji vê berxwedanê re îsbat kir ku îradeya azad serkeftinê ava dike.”
ˈMîrateya berxwedana Kobanê bi ser dikeve’
Rêveberiya Xweser bi vê boneyê cangorî û birîndarên berxwedana Kobanê bi bîr anî û daxuyand ku mîrateya vê berxwedanê îro li hemberî êrişên dewleta Tirk û çeteyên wê yên ku dixwazin îradeya gel bişkînin, bi ser dikeve.
Rêveberiya Xweser di dewama daxuyaniyê de diyar kir ku divê destkeftiyên ku bi berxwedana Kobanê û şûnde hatin bidestxistin werin parastin û ev bang kir: “Divê tevahî hêzên nîştimanî yên sûriyeyî û civaka navneteweyî berpirsyariyên xwe li hemberî xetereyên li ser destkeftiyên Bakur û Rojhilatê Sûriyeyê û Bendava Tişrînê bi taybetî bi cih bînin. Berdewama êrişan wê karasetên rasteqîn li ser asta vegera DAIŞˈê, karasetên mirovî û xetereyên din wekî tevlihevî û şerê bê dawî bi xwe re bînin.”
ˈEm ê bi ruhê berxwedana Kobanê Sûriyeyek yekgirtî ava bikin’
Rêveberiya Xweser di dawiya daxuyaniyê de ev peyam da: “Berxwedana Kobanê ji bo bihêzkirin û geşkirina berxwedana me ya di hemû astan de dê bingeheke xurt bimîne. Ruhê vê berxwedanê li Bendava Tişrînê geş dibe û berdewam dike û serkeftinan bi dest dixe. Em ê bi vî ruhî ber bi pêkanîna hêviyên gelê xwe yên demokrasî û aştiyê ve bimeşin. Em ê bi ruhê berxwedana Kobanê herêmên dagirkirî rizgar bikin, dagirkeran derxînin û hemû projeyên hegemonîk têk bibin. Em ê bi xwişk û biradarên xwe yên welatparêz ên sûriyeyî re Sûriyeke bihêz, yekgirtî û demokratîk, ava bikin.”
HSD: Em bi ruhê Kobanê li ber xwe didin
Hêzên Sûriya Demokratîk (HSD) jî bi heman minasebetê daxuyaniyek belav kir.
Daxuyaniya HSDê bi vî rengî ye:
“Îro 26ê Çile salvegera 10emîn a serkeftina berxwedana Kobanê ya li dijî rêxistina terorîst a DAIŞ’ê ye. Bi vê boneyê em hemû şehîdên xwe yên Yekîneyên Parastina Gel (YPG) û Yekîneyên Parastina Jin (YPJ) û hemû kesên xwebexş xwe yên ji parçeyên Kurdistanê û ji cîhanê yên ber bi kela berxwedanê Kobanê ve hatin û li hember rêxistina terorîst DAIŞê berxwedaneke qehremanî û fedekariyê nivîsandin, bi bîr tînin. ”
Serkeftina Kobanê bû destpêka têkçûneke erdnîgarî ya rêxistina terorîst a DAIŞê, ku, bi têkçûna wê li seranserê erdnîgariya Sûriyeyê tacîdar bû. Eger ne serkeftina Koban li dijî rêxistina terorîst bûya dê ev rêxistin heta roja îro ji bo hemû cîhanê metirsiyek berdewam mezin baya. Em dikarin bi wêrekî û zelalî bibêjin ku serketina Kobanê ne serkeftineke herêmî bû, lê serkeftineke ji bo tevahiya cîhanê bû, ji ber ku Kobanê rê vekir ku cîhan ji rêxistina terorîst a herî xirab a ku mirovahiyê nas kiriye xilas bibe.
Îro piştî deh sal ji salvegera serkeftina berxwedana Kobanê, ku em û cîhana azad vê salvegera bi rûmet pîroz dikin û bibîr tînin, keleha berxwedanê Kobanê niha rastî êrişên hovane yên berdewam ên dewleta Tirk a dagirker û çeteyên wê tê. Ev êriş kopiyeke dubare ya êrişên rêxistina terorîst a DAIŞê ne, dibe ku nav cuda be lê armanc yeke, ew jî têkbirina vîna azad a li Kobanê û tepisandina dengê berxwedana wê ye ku cîhan pê matmayî ma”.
Helbet eger dewleta Tirk a dagirker êrişek li dijî Kobanê bike; Bê guman em ê berxwedaneke ji ya ku me di salên 2014 û 2015an de li dijî rêxistina terorîst a DAIŞê pêk anîbû, xurtir bikin û Hêzên Sûriyeya Demokratîk bi biryar e ku Kobanê û gelê wê ji hemû êrişên ku ji kîjan alî ve pêk bîn, biparêze.
Em bang li hemû gelên azad, welat, rêxistinên mafên mirovan kir ku li dijî êrişên dagirkeriyê yên dewleta Tirk û çeteyên wê bisekinin û rê li ber her êrişeke li dijî bajarê Kobanê bigirin.”
