Desteya Tenduristiyê ya Cizîrê û Heyva Sor a Kurd şandeya bijîşkên ji Başûrê Kurdistanê ji bo alîkariyên mirovî û tibî pêkêşî koçber û birîndaran bikin hatibûn Rojava, xelat kir.
Şandeyek bijîşkan ku ji 19 bijîşkên ji bajarên Silêmanî û Hewlêrê yê Başûrê Kurditanê pêk tê di 1ˊê Sibatê de, bi armanca pêşkêşkirina alîkarî û xizmetên tibî û mirovî ji bo koçber û birîndaran, gihîşt Rojava.
Şande 2 rojan li bajarê Dêrikê xebat kir, serdana navendên demkî yên koçberan kir, rewşa birîndar û pêdiviyên wan ên tenduristî şopand. Piştre berê xwe de bajarê Qamişloyê, li wir jî 2 rojan ma, serdana navendên tenduristiyê û navendên demkî yên koçberan, serdana Navenda Heyva Sor a Kurd û Meclisa Rêveber a Rêveberiya Xweser a Cizîrê kir.
Di serdan û gera şandeyê de, bijîşkan koçberên nexweş derman kirin, li gorî pêdiviyan derman li wan belav kirin. Ev gav, ji bo sivikkirina zehmetiyên kesên zirardîtî û piştevaniya beşa tenduristiyê ya herêmê bû.
Desteya Tenduristiyê û Heyva Sor a Kurd îro, ji bo erk û misyona şandeya bijîşkan û hewldanên wê yên mirovî û bijîşkî ku di hefteyekê de ji bo xizmeta gelê Rojava pêk anîne, şande xelat kir.
Wê bijîşk îro berê xwe bidin bajarê Dêrikê, da ku sibe derbasî Başûrê Kurdistanê bibin.
