Komeleya ZIWAN ZIMAN KURD ya navçeya Sêwêregê ya Rihayê bi şahiyekê avakirina saziya xwe îlan kir.
Komeleya Lêkolîn û Pêşvebirina Çand, Huner û Zimanê Kurdî (ZIWAN ZIMAN KURD) a navçeya Sêwêregê ya Rihayê bi komîna welatiyan sazî ava kir. Komeleyê bi şahiyekê avakirina xwe îlan kir. Di vekirina komeleyê de Parlamenterê DEM Partiyê yê Rihayê Omer Ocalan, nûnerên DBP, Aktîvîstên TJA, Dayîkên Aştiyê, MED-DER, OHD, SENDÎKA, MA Muzîk, Tîma Sporê ya Navçeyê û nûnerên gelek saziyên sivîl beşdar bûn. Di bernameyê de pankartên “Dar Bi Ser Kokê Xo, Merdim Bi Ziwanê Xo Beno a Kiho”, “Kurdno! An Nebêjin Em Kurdin An Jî Bi Zimanê Xwe Biaxivin” û “Bi Civaka Demokratîk Ber Bi Jiyana Komîlast ve” daliqandin. Di bernameyê de dirûşmeyên “Jin Jiyan Azadî”, “Ziman Jiyan Azadî”, “Bê Ziman Jiyan Nabe”, “Bijî Kurd û Kurdistan” û “Bijî Serok Apo” berz kirin.
Komele bi pergala komunê ava kirin
Hevsderoka saziya ZIWAN ZIMAN KURD Ayşe Karacadag got: “Qada me gav lê avêtiye em bi hev re ne. Gelek dostên me tevli şahiya me bûn. Hin kesan tugle bi tugle alîkarî dan me û dîwarên saziyê avakirin. Hin kesan çay digerandin û ev xebat hemû bi awayekî kolektif hate mezinkirin. Ji betonên avahiyê zêdetir me ev der kiriye qada Çand, Huner û Zimanê Kurdî. Me ev der bi alîkariya gelê xwe ava kiriye. Ev der bi piştevaniya herkesî hat avakirin û bi dilê herkesî ye.”
Hevserokê ZIWAN ZIMAN KURD Faîk Taşkaya jî wiha got: “Dema ku me dest bi Komeleya xwe kir karekî gelek mezin li pêşiya me mebû. Em dixwazin gelê Sêwêregê hemû bi zimanê xwe biaxive. Erka me ya herî mezin kar û xebatên me yên ziman in. Em ê hewl bidin ku vê mezin bikin heqê karê xwe bidinê.”
‘Dema ku ziman tune be em ê roj bi roj ji xwebûna xwe dûr bikevin’
Herî dawî Parlementerê DEM Partiyê yê Riha Omer Ocalan ku beşdarî vekirina Komeleya Zimanê Kurdî ya navçeya Sêwêregê bû got: “Gelê Kurd bi çand û hunera xwe û bi zimanê xwe li ber xwe dide. Divê ku tu kes têkoşîna gelê Kurd û hewldanên wan biçûk nebîne. Divê em Kurd hertim nasnameya xwe biparezin. Heta ku ev sazî hat avakirin gelek pirsgirêk hatin jiyîn. Gelê Sêwêregê gelekî pir têkoşer e. Hewldanên bişaftinê yên li ser zimanê Kurdî bi sedsalan e têne meşandin. Em bi çand, ziman û têkoşîna xwe li ber xwe bidin. Divê em li Kurdistanê û hemû qaden Tirkiyeyê zimanê Kurdî berfireh bikin û herder bikin Kurdî. Divê em destê hev bigirin Çand, Ziman û hunera xwe li her derî li ser piya bihêlin. Divê em ji bo ziman avahiyan ava bikin û naveroka wan avahiyan bi fikr û felseyeke mezin li Rojhilata Navîn belav bikin. Avakirina van saziyan jî hemû bi fikr felsefeya vê rêxistinê ye. Em ê vê ya her tim mezin bikin. Dema ku ziman tune be em ê roj bi roj ji xwebûna xwe dûr bikevin.”
Bername bi şahiya stranan û bi vekirina kordeleyê ya ku bi destê Dayîkên Aştiyê hat birîn hate vekirin û bername bi dawî bû.
