Serokê HADEP’ê Serdar Taniş û rêveberê wê Ebubekîr Denîz di salvegera windakirinên xwe ya 25emîn de hatin bîranin. Di bîranînê de hat xwestin ku bûyer bê ronîkirin, faîl werin diyarkirin û cezakirin.
Serokê Navçeya HADEP’ê yê Silopiyayê Serdar Taniş û rêveberê demê Ebubekir Deniz ku di 25ê Çileya 2001an de li navçeya Silopyaya Şirnexê hatin binçavkirin û ji wê demê ber bi îro ve tu agahî nayê girtin. Serdar Taniş û Ebûbekir Denîz di salvegera 25emîn a windakirinên xwe de de bi daxuyaniyekî girseyî hatin bîranîn.
Daxuyanî pêşiya avahiyê DEM Partiyê yê Silopyayê hat xwendin. Malbatatên Serdar Taniş û Ebûbekir Denîz, parlamenterên DEM Partiyê yê Şirnexê, aktivîstên TJAyê, Dayikên Aşitiyê, rêxistinên DBPê û DEM Partiyê tevlî daxuyaniyê bûn. Di daxuyaniyê de pankarta “Ew hê wenda ne, em şopdarên riya we ne” hat vekirin.
Metna daxuyaniyê hevseroka DEM Partiyê ya Silopiyayê Besê Cevîz xwend. Besê Cevîz, diyar kir ku heta ku kujer bên dîtin û ji wan hesab bê pirsîn ew ê têkoşîna xwe ya rewa bidomînin.
‘Bavê min li ku ye?’
Piştre keça Ebubekîr Deniz, Ceylan Denîz axivî. Ceylan Denîz jî got ku piştî wendakirina bavê wê Serdar Taniş jiyana wan serûbino bûye û got: “Bavê min mirov nizane ku ye, dicemide, li me difikire em nizanin. Em zarok bûn, mesin bûn, zewicîn lê bavê min yek ji van jî nedît. Qet nebe xwezî şahiditiya keyfxweşiya me kiriba. Tu li ku derê bî dilê me li wir diavêje. Bavê min Ebubekîr Denîz ne tenê navek bû, bavek bû, mirovek bû, zarokê dayikekî bû. Ez dixwazim ku rastiyê bizanim, bavê min li ku ye? Em ji bîr nakin û em ê jibîr nekin.”
‘Aqûbeta zarokên me ronî bikin’
Piştre bavê Serdar Taniş Şûayîp Taniş axivî. Şûayîp Taniş jî bi lêv kir ku ev 25 sal in ku ew ti agahî jî Taniş û Denîz nagirin û daxwaz kir ku kujer demildest bên dîtin û aqûbeta zarokên wan bê ronîkirin.
‘Kujerên wan li Rojava Kurdan qetil dikin’
Parlamentera DEM Partiyê Newroz Uysal Aslan jî ev tişt gotin: “Ê ku ji wendabûyina van hevalan berpirsyar Levent Ersoz e. Ne tenê ev herdû heval, gelek hevalên din jî ji aliyê van kesan ve hatin windakirin. Di wan salan de gelek kes bi awayeke qirêj hatin wendakirin. Ev destê qirêj îro jî li Rojava gelê kurd qetil dikin. Dewleta Tirk van sûcên şer vedişere û piştgiriya wan dike. Lê îro gelê kurd li dijî komkujiyê û qirkirinê li ser piya ye û dê vê yekê qebûl nake. Niha li wir agitbest ragihandine lê belê hê dorbêç didome. Divê ku mûzakere bên destpêkirin û vî şerî bidin sekinandin. Ne em keziyên jinên ku hatine birîn ji bîr dikin, ne jî em zarokên ku ji sarmayê mirîn ji bîr dikin û ne jî em Taniş û Denîz ji bîr dikin.”
Daxuyanî bi berzkirina dirûşma “Şehîd namirin”, “ Bijî berxwedana Rojava” bi dawî bû.
