TJAyê li Amed û Wanê deklerasyona çareseriyê aşkere kirin. TJAyê diyar kirin ku pêşengê vê pêvajoyê ew in gotin: “Rêya pêkanîna vê yekê jî hilweşandina sîstema qirkirinê ya li Îmraliyê û azadiya fizîkî ya Rêberê Gelê Kurd Ocalan e. Weke jinên TJAyê em dizanin ku pêşengên vê pêvajoyê em in.”
Jinên Azad (TJA) li Amed û Wanê di çarçoveya pêngava “Jin ji bo azadiya Serokatî, ji bo çand û zimanê Kurdî, li dijî tundiya li ser jinê têdikoşin” de deklarasyona xwe eşkere kir. Daxuyaniya Amedê li Komeleya Çand û Hunerê ya Dîcleyê dan. Berdevka Meclisa Jinan a DBPê Bêrîvan Bahçecî û Berdevka Meclisa Jinan a DEM Partiyê Halîde Turkoglû û gelek jin tev li bûn. Li ser navê jinan, Hevseroka BDPê Sultan Yaray daxuyanî bi kurdî xwend u wiha got: “Em Jin Ji Bo Azadiya Serokatî Ji Bo Çand û Zimanê Kurdî Li dijî Tundiya Li Ser Jinê Têdikoşin. “
Sultan Yaray anî ziman ku xelasbûna ji krîzên ku ji aliyê Modernîteya Kapîtalîst ve hatine afirandin, encax bi pergala ya konfederal a demokratîk a azadîxwaziya jinê pêkan e. Rojhelata Navîn, îro bi rêya netew-dewletên serdest ên mêr û kapîtalîst, bi destê sermayedarên ku wan bi rê ve dibin; bi qirkirina jinê, qirkirina çandî, înkar û îmhayê careke din bûye navenda şerê cîhanê yê 3’yemîn. Her çendî weke zemîna nakokiyên herî kûr ên şaristaniya ku xwedî dewlet e were dîtin jî, divê neyê jibîrkirin ku Rojhilata Navîn welatê hêzên modernîteya demokratîk ên ku modelên jiyana azad û wekheviyê afirandine û ji bo vê yekê berxwedaneke bêhempa meşandine ye. Bi bingeha xwe ya dîrokî ya çanda jina azad û bi cihêrengiya xwe ya ku berxwedana civakî zindewar dike; ew heqîqet bi xwe ye ku em dijîn, dizanin, dibinin kêliya herî nêz a azadiyê di nav xwe de dihewîne. Ji ber vê yekê jî têkoşîna nûnerên îroyîn ên her du şaristaniyan a ji bo avakirina desthilatdariya xet û pergalên xwe yên îdeolojîk di asta herî nêzîk a serkeftinê de ye.”
Sultan Yaray da zanîn ku aliyekî têkoşînê bi îdeolojiyên xwe yên olî, neteweperestî, zanistperestî û zayendperestiyê, dewletên netewe yên ku çavkaniya hemû krîzên civakî, aborî, siyasî û çandî yên li cîhanê ne, temsîl dikin û wiha axivî: “Sedema kiryarên ku li Rojhilata Navîn û Afrîkayê jinan qetil dike, her malekê vediguherîne pergala zindanê, bi awayeke sistematik tecawiz û qetlîamê li ser zarokan pêk tîne û serdema polîtîkayên ku jinan di bin navê azadiyê de îstîsmar dike, keda wan bêqîmet dike, wek meta dibîne û xizaniya jinê kûrtir dike, heman çavkanî ye, pergala modernîteyê ye. Bi geşedanên dawî yên ku li Sûriyeyê pêk tên, careke din hate dîtin ku bêyî xelasbûna ji zihniyeta netewe-dewleta yekperest a modernîteya kapîtalîst, çareseriyeke mayînde ne pêkan e. Piştî hilweşandina rejîma Baas’ê, Sûriye veguherî pêvajoyeke wisa ku hemû hêzên herêmî û hegemonîk hewl didin ku ji bo berjewendiyên xwe sîstemekê ava bikin, lê dîsa têkoşîna gelan a azadiyê tê paşguhkirin.”
Sultan Yaray, anî ziman ku li aliyê din temsîliyeta paradîgmaya azadiya jinê ya ekolojîk a demokratîk, pergala konfederalîzma demokratîk a ku li Rojava bûye parçeyeke ji jiyanê û zîhniyeta ku li ser vê yekê hatiye avakirin heye û wiha berdewam kir: “Modernîteya kapîtalîst îro hewl dide ku me bifetisîne, hêza ku me ji vê taritiyê xelas bike û çareseriyê pêk bîne bê guman afrînerê vê fikiriyatê, Rêberê Gelê Kurd Birêz Ocalan e ku ji bo azadiya jin û gelan modela jiyana nû bi perspektîfa neteweya demokratîk pêşkêş dike. Bi vê hêz û baweriyê jin û gelê Kurd ku pêşengên modernîteya demokratîk in careke din çarenûsa xwe radestî ti netewe dewletê nakin. Bi Şikandina Tecrîdê re Bidestxistina Azadiya Fîzîkî Ji Bo Jin û Gelan Yekane Rêya Avakirina Jiyana Azad e.”
Sultan Yaray destnîşan kir ku Tevgera jina Kurd, bi têkoşîna azadiyê, xwe, civak û gerdûna ku tê de dijî watedar dike, bi rêya vê têkoşînê jiyana ku dixwaze bijî, rastiya xwe bi jiyana azad diyar dike û wiha berdewam kir: “Jiyana demokratîk û azad a jin û gelan bi xelasbûna ji zihniyeta modernîteya kapîtalîst a ku netew-dewlet xwe dispêrin, bi pergala konfederal a demokratîk a jinan pêkan e. Armanca Şerê Cîhanê yê Sêyemîn ê ku em tê de derbas dibin ew e ku vê îdeala jiyanê ji hiş û hestên gel û jinan derxîne û çanda jinê ji holê rake. Şerê Cîhanê yê 3’yemîn her çiqas bi vî rengî neyê binavkirin jî, ev şerekî nehiqûqî û bêexlaqî ye ku li dijî jinan pêk tê.”
Sultan Yaraş bal kişand ser recîma îmraliyê û got: “Nîşaneya herî şênber a vê jî rejîma îşkenceyê a li Îmraliyê ye, ku bi komployeke navneteweyî ya ku di dîrokê de mînaka wê kêm e dest pê kir û encama polîtîkayên şer ên 26 sal in bê navber berdewam dike ye. Polîtîkayên qirkirinê yên ku êrîşên qirkirina çandî kûrtir dike, hewl tê dayin ku pergala tecrîdê li her qadêm jiyanê de bê avakirin, gel ji bo fînansekirina şer, mehkûmê birçîbûn û xizaniyê dibin, li dijî rêhevaltiya Rêberê Gelê Kurd Birêz Ocalan a bi jinan re, bi konsepta şerê taybet rasterast bedena jinê, jiyan, ked, çand, û azadiya jinê hedef girt. Bersiva jinên ku her dem mehkûmî şîdetê ne, herî zêde bi birçîbûn û xizaniyê re rû bi rû ne, ji ziman û çanda xwe dûr ketine û dixwazin di tarîtiya feodalîzmê de bên tunekirin, zelal e; bi têkoşîna azadiya jinê re wê tecrîd bê şikandin û azadiya fîzîkî pêk were. Li Dijî Tecrîda Tutleq Heta Azadiya Mutleq Pêk Were Wê Têkoşîna Me Bidome.”
Sultan Yaray, li ser têkoşîna li dijî komployê jî rawestiya û ev tişt got: “Xeta têkoşînê ya bênavber ku ji ber komploya navneteweyî bi vê îdîayê didome, polîtîkayên tecrîdê bê encam hişt û di vê pergalê de deriyekî vekir. Piştî 44 mehên ku ji îmraliyê ti agahi nedihat girtin, 3 hevdîtinên ku bi Rêberê Gelê Kurd Ocalan pêk hatin, encama têkoşîna ku bi pêşengiya jinan tê meşandin e. Her çend bi hevdîtinan di nav hemû civak û jinan de hêvî û moralek mezin avakiribe jî, lê tecrîd hê berdewam dike,ev yek careke din nîşanî me da ku divê em têkoşînê bê navber û bi biryar bidomînin. Em daxuyaniyên heyeta partiya DEM’ê û deklerasyona wan a ku ji 7 xalê pêk tê, ji bo çareseriya pirsgirêka Kurd û demokratîkbûna Tirkiyeyê girîng dibînin. Ev îradeya çareseriyê wê ne tenê ji bo pirsgirêkên Tirkiyeyê bibe çareserî, ji bo xelasbûyina ji qeyranên pergala gerdûnî jî bibe bingehê modela jiyana hevpar û azad. Ji ber vê sedemê jî divê hewldanên diyalogê yên ku pêk tên veguhere çareseriyeke mayînde. Rêya pêkanîna vê yekê jî hilweşandina sîstema qirkirinê ya li Îmraliyê û azadiya fizîkî ya Rêberê Gelê Kurd Ocalan e. Weke jinên TJAyê em dizanin ku pêşengên vê pêvajoyê em in û bi vê pêngava ku me daye dest pê kirin, em daxwaza xwe ya çareseriya pirsgirêka Kurd û azadiya birêz Ocalan bi çapemenî û raya giştî re parve dikin . Pêngava me li ser bingeha avakirina jiyana demokratîk, ekolojîk, azadiya jinê, demokratîkbûna Tirkiyeyê û daxwaza azadî û wekheviyê ya jinan pêk tê, ji bo vê yekê em ê ji bo şikandina tecrîdê têbikoşin û li ser vî esasî xwe birêxistin bikin.”
Sultan Yaray destnîşan kir ku dê li ser vê bingehê têkoşîna xwe berdewam kirin û bi van xalan bal kişand ser xebatên xwe yên têkoşînê:
*Em ê pêngava xwe heta şikandina tecrîda li ser Rêberê Gelê Kurd Birêz Ocalan, avakirina şert û mercên xebat û jiyana wî ya azad bidomînin.
*Di hemû dema pêşkeftinê de em ê li hemberî perspektîfên çareseriyê ya ku ji aliyê Rêberê Gelê Kurd Birêz Ocalan ve hatine pêşkêşkirin, xwe berpirsyar bibînin.
*Ji bo çareseriya demokratîk a pirsgirêka kurd û ji bo ku mafên gelê kurd bi makezagonê pêk were, em ê bênavber têbikoşin.
*Em ê li dora perspektîfa çareseriyê ya ku Rêberê Gelê Kurd Birêz Ocalan, pêşkêşî gelên bindest û jinan, bi taybetî li Rojhilata Navîn dike, têkoşîneke hevpar bi rêxistin bikin.
*Li dijî her cure polîtîkayên asîmîlasyon û qirkirinê yên li ser ziman û çanda Kurdî berdewam dikin, em ê nirxên xwe yên çandî mezin bikin.
* Em ê erdnîgariya xwe ya ku hewl tê dayîn bibe navenda feodalîzm û paşverutiyê, zarokên ku pêşeroja wan bi polîtîkayên qirkirinê tê tarîkirin, ciwan û jinên ku bûne hedefa şerê taybet, bi perspektif civaka demokratîk biparêzin.
* Li ser bingehê tezên azadiya jinê û perspektîfên jinê yên Rêberê Gelê Kurd ku bingeha rizgariya ji qirkirina jinê û qirkirina çandî ye; Em ê hişmendiya zayendî, hezkirina zayendî, jiyana azad û hişmendiya xweparastinê pêş bixin.
* Pêvajoya pêngava ku me daye destpêkirin heta ku em azadiya Rêberê Gelê Kurd Birêz Ocalan li ser van hemû esasên têkoşînê pêk bînin wê bidome.
*Gotinên efsûnî yên JIN JIYAN AZADI ya ku li hemû cîhanê belav bûye û bûye manîfestoya hemû jinên cîhanê, bangawaziya birêxistinkirina jiyana nû dike, em jinên TJA’yê bi vê felsefeyê careke din bang li hemû gelên Tirkiyeyê, di serî de jin û raya giştî ya demokratîk dikin ku bi fikir, dil û çalakiyên xwe beşdarî pêngava ku me daye destpêkirin bibin da ku ev pêvajo veguhere zemîneke ku em bi hev re destkeftiyên mezin û azadiyê bi dest bixin. “
Wan
Tevgera Jinên Azad (TJA), li Wanê jî bi boneya salvegera Komploya 15ê Sibatê li Eywana Konferansê ya
Tahîr Elçî ya Baroya Wanê deklerasyonek aşkere kir. Di eywanê de pankarta “Jin Jiyan Azadî”
daliqandin û bi projeksiyonê nivîsa “jin, ji bo azadiya serokatî, ji bo çand û zimanê kurdî, li dijî tundiya
li ser jinê têdikoşin” li ser depê hat vedan. Gelek aktivîstên TJAyê tev li daxuyaniyê bûn. Metna daxuyaniyê ya Kurdî hevseroka DBPê ya Wanê Gonul Ûzûnay, metna Tirkî jî Fadîme Polat xwend.
Daxuyanî bi dirûşmeya “Jin Jiyan Azad” bi dawî bû.
