Amed – Hevberdevkên Komîsyona Ziman Çand û Hunerê ya DEM Partiyê nerazîbûn nîşanî şirketa Pegasusê dan ku cihêkarî li ser zimanê Kurdî kiribû û gotin ku Pegasusê bêrêzî li zimanê Kurdî kiriye.
Di şirketa rêya hewayî ya Pegasusê de li ser zimanê Kurdî cihêkarî hatibû kirin. Ev cihêkarî di seferek Pegasûsê ya ji Stenbolê roja 10ê Hezîranê dihat Amedê hatibû kirin. Nerazîbûnên li dijî vê cihêkariyê Pegasûsê berdewam dikin.
Hevberdevkên Komîsyona Ziman, Çand û Hunerê ya DEM Partiyê Heval Dilbihar û Cemîle Turhalli nerazîbûn nîşanî cihêkariya şirketa Pegasusê dan.
Dilbihar: Divê lêborînê ji Kurdan bixwazin
Heval Dilbihar diyar kir ku ew careke din dibêjin ku hemû kiryarên li dijî zimanê Kurdî û nirxên neteweya Kurd kiryarên li dijî neteweya Kurd û mirovahiyê ne û got: “Ev yek sûcekî mezin ê li dijî miriovahiyê ye. Parçeyek ji tevkujiyê ye.”
Heval Dilbihar da zanîn ku di sedsala 21emîn de rûdana kiryarên li dijî zimanekî hovîtiyeke nîjadperest e û wiha axivî: “Em hemû kiryarên li dijî zimanê Kurdî û hemû nirxên neteweya Kurd şermezar û nelet dikin. Divê xwediyên kiryarên li dijî zimanê Kurdî lêborîna xwe ji zimanê Kurdî û ji Kurdan bixwazin, xebat û xizmetên xwe bi zimanê Kurdî jî pêk bînin.
Em li dijî kiryarên hovane bedeng nemînin
Û divê baş bê zanîn ku em Kurd li dijî tu kiryarên hovane yên li dijî ziman û nirxên me yen neteweyî bêdeng namînin û em ê têkoşîna xwe bilindtir bikin. Bi vê boneyê em careke din bang li hemû Kurdan dikin ku li dijî hovîtiyên bi vî rengî li her derê têkoşîna xwe ya ji bo zimanê Kurdî bilindtir û berfirehtir bikin. Em dibêjin Kurdî bikin zimanê her dem û her derê. Statuya Kurdî, perwerdehiya bi Kurdî.”
‘Rêz nêde zimanê te, rêz nade te jî’
Hevberdevk Cemîle Turhalli jî derbarê mijarê de destnîşan kir ku ev mesele ne nû ye û got: “Berê jî ev cihêkarî hebû û niha jî didome. Li her deverê, mixabin bi giştî, êriş li ser zimanê Kurdî tê kirin. Ev êriş xwe di zarok û kalûpîran de nîşan dide, xwe li ser extiyaran dide der. Li Tirkiyeyê asîmîlasyon sîstemeke bi darê zorê ye. Di warê xizmetê de şert e ku rêz û hurmet hebe, heke rêz nede zimanê te, rêz nade te jî. Em vê nêzîkatiyê qebûl nakin, li ser vê divê zimanê Kurdî li qada giştî bê garantîkirin û statuya Kurdî hebe. Heke statuya zimanê Kurdî hebe, ev cihêkarî jî çênabe, ev mînak eşkerekirina polîtîkayekên bişaftinê ye. Divê zimanê Kurdî bê qebûlkirin. Heke wisa nebûya, karkerek an karmendek nedikarî wisa bigota, niha li nexweşxaneyan gelek welatî nikarin xwe bi Tirkî îfade bikin û dixwazin xwe bi Kurdî îfade bikin lê li bajarên rojavayê Tirkiyeyê êrîş li ser wan tê kirin. Li ser vê divê zimanê mirovan bê qebûlkirin, daxwaza me ya sereke ev e ku li qada giştî zimanê Kurdî bibe xwedî statu û zimanê fermî be.”
